CNN. Թրամփը «քնել է» Օվալաձև աշխատասենյակում հանդիպման ժամանակ

ԱՄՆ նախագահ Դոնալդ Թրամփի հակառակորդները կրկին կասկածի տակ են դրել նրա աշխատունակությունը, այն բանից հետո, երբ համացանցում հայտնվել են նրա լուսանկարները, որոնցում նա  Օվալաձև աշխատասենյակում հանդիպման ժամանակ փակ աչքերով է, հաղորդում է CNN-ը։

Ըստ հեռուստաալիքի՝ երբեմն թվում էր, թե Թրամփը դժվարանում էր աչքերը բաց պահել։ Կալիֆոռնիայի նահանգապետ Գևին Նյուսոմի մամուլի ծառայությունը լուսանկարները մակագրել է. «Քնկոտ Դոնը վերադարձել է»։

Սպիտակ տունը հայտարարել է, որ նախագահը արթուն է եղել։ Վարչակազմի պաշտոնյաները ընդգծել են, որ Թրամփը հանդիպման ժամանակ խոսել է և պատասխանել լրագրողների հարցերին։

CNN-ը նշել է, որ ամերիկացի առաջնորդի առողջության մասին ենթադրությունները շարունակվում են նրա պաշտոնը ստանձնելուց ի վեր։ Թրամփը նախկինում հայտարարել էր, որ բժշկական զննման շրջանակներում ՄՌՏ հետազոտություն է անցել՝ առանց բացահայտելու պատճառները, և այս ամռանը նրա մոտ հայտնաբերվել է քրոնիկ երակային անբավարարություն։