Նոյեմբերի 9-ի փաստաթղթով հնարավոր էր պահել Արցախը, Փաշինյանը հրաժարվեց․ Քոչարյան

ՀՀ երկրորդ նախագահը համեմատել է նոյեմբերի 9-ի փաստաթղթի 9-րդ կետը, որտեղ խոսվում է անխոչընդոտ ճանապարհի մասին, և Վաշինգտոնում ստորագրված փաստաթղթի նմանօրինակ կետը․ «Նույնն են բովանդակությամբ, ուղղակի այն տարբերությամբ, որ այն ժամանակ կար Արցախ, կար Լաչինի միջանցք։ Եվ այն ժամանակ, փոխանակ կառչել այդ կետից, Փաշինյանը հետևողականորեն հրաժարվում էր այդ կետի կատարումից։ Հիմա նույնատիպ մոտեցումը մատուցվում է որպես դարակազմիկ որոշում։ Ի՞նչ փոխվեց այդ ընթացքում` չկա Արցախը, չկա Լաչինի միջանցքը»։

Նրա խոսքով՝ պետք էր կառչել նոյեմբերի 9-ի եռակողմ փաստաթղթից և անել ամեն ինչ, որ այն կյանքի կոչվի։

ՀՀ երկրորդ նախագահ Ռոբերտ Քոչարյանի խոսքով՝ նոյեմբերի 9-ի փաստաթղթով հնարավոր էր պահել Արցախը։

ՀՀ երկրորդ նախագահը նշում է՝ ոչ ոք չի հորդորել վարչապետ Նիկոլ Փաշինյանին չեղարկել նոյեմբերի 9-ի փաստաթուղթը, քանի որ բոլորը հասկանում էին՝ նա պատերազմում պարտվում է։ Բայց, միևնույն ժամանակ, բոլորը հասկանում էին, որ սա նաև Արցախը պահպանելու հնարավորություն է․ «Փաշինյանի խոսքով՝ կորցնելով Արցախը՝ մենք ձեռք ենք բերել ինքնիշխանություն։ Այլ կերպ ասած, ըստ նրա, եթե մենք պահպանեինք Արցախը, չկորցնեինք հինգ հազար զինվոր, կդառնայինք մռայլ, դժբախտ, ոչ ինքնիշխան երկի՞ր»,- նշել է Քոչարյանը: