Գիտնականները բացահայտել են՝ ինչպես կարելի է կեսով նվազեցնել երկրորդ ինֆարկտի ռիսկը

Ամերիկյան սրտաբանների ասոցիացիայի (AHA) տարեկան համաժողովում ներկայացված նոր ուսումնասիրությունը ցույց է տվել, որ վիտամին D3-ի անհատական դեղաչափի ճիշտ ընտրությունը կարող է կեսով նվազեցնել երկրորդ ինֆարկտի առաջացման վտանգը նրանց մոտ, ովքեր արդեն ունեցել են սրտային նոպա։ Հետազոտությունը կատարվել է Intermountain Health բժշկական կենտրոնի մասնագետների կողմից։

Ուսումնասիրությանը մասնակցել է 630 հիվանդ․ նրանց մի մասին տրամադրվել է սովորական բուժում, իսկ մյուսներին՝ «անհատականացված» թերապիա՝ պարբերաբար վերահսկելով արյան մեջ վիտամին D-ի մակարդակը և հարմարեցնելով դոզան մինչև օպտիմալ ցուցանիշ (ավելի քան 40 նգ/մլ)։ Արդյունքում այս մոտեցումը 50 տոկոսով նվազեցրել է երկրորդ ինֆարկտի հավանականությունը, առանց որևէ կողմնակի ազդեցության։

Գիտնականների խոսքով՝ վիտամին D-ի սովորական հավելումները հաճախ քիչ արդյունք են տալիս, մինչդեռ անհատական չափաբաժնի ճշգրիտ վերահսկումը կարող է դառնալ սրտանոթային հիվանդությունների կանխարգելման նոր մեթոդ, հատկապես հաշվի առնելով, որ D վիտամինի պակասը այսօր նկատվում է աշխարհի մեծ մասի բնակչության մոտ։