Գիտնականները հերքել են «Օզեմպիկի» վտանգավորության մասին տարածված միֆը

Ամերիկյան սրտաբանների ասոցիացիայի (AHA) 2025 թվականի գիտաժողովում ներկայացված նոր հետազոտությունը ցույց է տվել, որ GLP-1 խմբի դեղամիջոցները, այդ թվում՝ Ozempic-ը և սեմագլուտիդը, չեն բարձրացնում պանկրեատիտի կամ սրտանոթային բարդությունների ռիսկը, նույնիսկ բարձր տրիգլիցերիդներով հիվանդների մոտ։ Վերլուծությունը կատարվել է Intermountain Health կենտրոնի մասնագետների կողմից՝ ներառելով ավելի քան 346 հազար հիվանդի տվյալներ։

Մինչ այժմ բժիշկները խուսափում էին նման դեղամիջոցներ նշանակելուց հիպերտրիգլիցերիդեմիայով հիվանդներին՝ ենթադրելով, որ դրանք կարող են վնասել ենթաստամոքսային գեղձը։ Սակայն նոր ուսումնասիրությունը ցույց է տվել, որ GLP-1 ագոնիստներ ընդունող հիվանդների մոտ պանկրեատիտի դեպքեր չեն ավելացել, իսկ այն մարդկանց մոտ, ովքեր նախկինում չէին տառապել այս հիվանդությամբ, ռիսկը նույնիսկ չորս անգամ ավելի ցածր է եղել։

Գիտնականները եզրակացրել են, որ տվյալ դեղամիջոցները անվտանգ են բարձր տրիգլիցերիդներով հիվանդների համար և կարող են լայնորեն կիրառվել շաքարային դիաբետի ու գիրության բուժման մեջ։ Ավելի վաղ պարզվել էր, որ սեմագլուտիդը կարող է նաև 20 տոկոսով նվազեցնել ինֆարկտի և ինսուլտի ռիսկը, նույնիսկ եթե հիվանդը չի կորցնում քաշ։