Իտալիան կշարունակի բազմակի վիզաների տրամադրումը ռուս զբոսաշրջիկներին միայն բացառիկ դեպքերում

Իտալիայի արտաքին գործերի նախարարությունը հայտարարել է, որ երկիրը կպահպանի Եվրահանձնաժողովի որոշումը՝ սահմանափակելու ռուս զբոսաշրջիկների համար բազմակի վիզաների (մուլտիվիզաների) տրամադրումը, սակայն թույլ կտա դրանց հատուկ դեպքերում։ Այս մասին հայտնում է РИА Новости-ն։

Նախարարության ներկայացուցիչը նշել է, որ բազմակի մուտքի վիզաներ կարող են տրվել միայն այն քաղաքացիներին, որոնց դիմումները կունենան հստակ և համոզիչ հիմնավորում։ Այդ դեպքերում Իտալիան պարտավոր է փաստացիորեն ապացուցել տրամադրման անհրաժեշտությունը, իսկ դիմորդները պետք է ցույց տան իրենց բարեխղճությունն ու վստահելիությունը, համաձայն ԵՄ վիզային օրենսգրքի պահանջների։

Հիշեցնենք, որ նոյեմբերի 7-ին Եվրահանձնաժողովը պաշտոնապես հայտարարել էր ռուսաստանցիներին նոր բազմակի վիզաների տրամադրության արգելքի մասին՝ պատճառաբանելով, որ Ռուսաստանի քաղաքացիների նկատմամբ պետք է իրականացվի առավել խիստ և մանրակրկիտ ստուգում՝ մուտքի թույլտվություն ստանալու առաջ։