«Կարևոր է, որ ռազմական իրադարձության օր չլինի»․ Ռուբինյանը՝ հունվարի 27-ը «Հիշատակի և խոնարհումի օր» սահմանելու մասին

ԱԺ-ն քննարկում է պատգամավորներ Ռուբեն Ռուբինյանի ու Գեղամ Նազարյանի հեղինակած օրինագիծը, որով առաջարկվում է հունվարի 27-ը սահմանել «Հիշատակի և խոնարհումի օր»։ Այն լինելու է ոչ աշխատանքային օր:

«Մինչ օրս համապետական հիշատակի օր ընդունված չէ, և մենք կարծում ենք, որ նաև հաշվի առնելով վերջին տարիների իրադարձությունները՝ ապրիլյան պատերազմի, 44-օրյա պատերազմի, ՀՀ դեմ հարձակումների օրերին, 2023թ. սեպտեմբերյան օրերին մեր տված զոհերի փաստը, կարևոր են դարձնում մեկ օրվա սահմանումը»,- ասել է նա։

Իսկ թե ինչու հենց հունվարի 27-ն են առաջարկում, Ռուբինյանը մանրամասնել է. «Չենք կարող առաջարկել օր, որը ինչ-որ ռազմական իրադարձության օր է, այդ դեպքում անխուսափելի հարց կառաջանար՝ ինչու այս օրը, այլ ոչ թե մեկ այլ։ Հետևաբար, կարևոր էր ընտրել օր, որը ռազմական իրադարձության օր չէ, բայց նաև պետք էր ընտրել օր, որը որոշակի տրամաբանություն ու սիմվոլիզմ ունի։ Եւ մենք համարում ենք, որ հունվարի 27-ը կարող է լինել այդ օրը, երբ առաջին օրը հարգանքի տուրք կմատուցենք հայրենիքի պաշտպանության համար զոհվածներին, կհարգենք նրանց հիշատակը, իսկ արդեն հաջորդ օրը որպես շարունակվող կյանքի, անկոտրում կամքի խորհրդանիշ, կտոնենք բանակի օրը»։