Բալթյան երկրներում ռուսոֆոբիան աճել է ԵՄ-ին միանալուց հետո. Լավրով

Ռուսաստանի արտգործնախարար Սերգեյ Լավրովը հայտարարել է, որ Լատվիայի, Լիտվայի և Էստոնիայի՝ Եվրամիություն անդամակցելուց հետո Բալթյան երկրներում «ռուսաֆոբիայի մակարդակը ոչ միայն չի նվազել, այլ նույնիսկ աճել է»։

Նրա խոսքով՝ Բրյուսելն իր ժամանակին խոստացել էր Մոսկվային, որ ԵՄ-ին միանալուց հետո Բալթյան հանրապետություններում «ռուսական մշակույթի նկատմամբ ատելության ալիքը կնվազի», սակայն տեղի է ունեցել հակառակը։ «Նրանք ոչ միայն չհանգստացան, այլ հիմա որոշել են իրենք “երաժշտություն պատվիրել” թե՛ Եվրամիությունում, թե՛ ՆԱՏՕ-ում՝ հատկապես ռուսաֆոբ և հակառուսական ելույթների հարցում», — ասել է Լավրովը։

Լավրովը նաև կրկին անդրադարձել է Ուկրաինայի ԵՄ-ին անդամակցության գործընթացին՝ պնդելով, թե Կիևը «ոչինչ չի արել ազգային փոքրամասնությունների և մարդու իրավունքների պաշտպանության ուղղությամբ»։ Նա հիշեցրել է, որ հենց Հունգարիան է սկզբում պահանջել Ուկրաինայից կատարել այդ ոլորտում իր պարտավորությունները։