Արսեն Թորոսյանը և Սերբիայի դեսպանը քննարկել են համագործակցության ընդլայնման հնարավորությունները

Աշխատանքի և սոցիալական հարցերի նախարար Արսեն Թորոսյանը այսօր ընդունել է ՀՀ-ում Սերբիայի Հանրապետության արտակարգ և լիազոր դեսպան Տատյանա Պանայոտովիչ Ցվետկովիչին։ Այս մասին տեղեկացնում են ԱՍՀ նախարարությունից:

Հանդիպման ընթացքում քննարկվել են ժողովրդագրության, գենդերային հավասարության և կանանց տնտեսական հզորացման ուղղություններով համագործակցության ընդլայնման հնարավորությունները։ 

Նախարար Թորոսյանն ընդգծել է երկու երկրների միջև հաստատված բարեկամական հարաբերությունների և արդյունավետ երկխոսության կարևորությունը՝ վերահաստատելով Հայաստանի պատրաստակամությունը երկկողմ համագործակցությունը զարգացնելու վերաբերյալ։ Նախարարն անդրադարձել է նաև «Բելգրադի կանանց համաժողով - RISE 2025» միջազգային նախարարական համաժողովի արդյունքներին, ինչպես նաև Սերբիայի գործընկեր նախարարների հետ նախորդիվ ունեցած հանդիպումների ժամանակ քննարկված մի շարք հարցերի ընթացքին։

Դեսպան Ցվետկովիչն ընդգծել է ԱՍՀ նախարարության հետ ձևավորված արդյունավետ համագործակցության դերը և Սերբիայի պատրաստակամությունը այն զարգացնելու ուղղությամբ։ Դեսպանը ողջունել է Հայաստանի տնտեսական զարգացման ուղղությամբ պետության քաղաքականությունը։

Հանդիպման ընթացքում զրուցակիցները խոսել են նաև ոլորտային հուշագրի ստորագրման հնարավորության մասին և պայմանավորվել շարունակել քննարկումներն այս ուղղությամբ։