ԱՄՆ-ում թռիչքի ընթացքում ճաքել է American Airlines-ի ինքնաթիռի օդաչուների խցիկի ապակին

American Airlines-ի ուղևորատար ինքնաթիռը ստիպված է եղել վայրէջք կատարել Օհայո նահանգի Քոլումբուս քաղաքում, երբ թռիչքի ընթացքում ճաքել է օդաչուների խցիկի դիմապակին։ Ինչպես հաղորդում է DC News Now-ը, միջադեպը տեղի է ունեցել նոյեմբերի 11-ին՝ Չիկագոյից Վաշինգտոն մեկնող չվերթի ժամանակ։

Ինքնաթիռի անձնակազմը բարձրախոսով հայտնել է ուղևորներին, որ տեխնիկական պատճառներով անհրաժեշտ է կատարել չնախատեսված վայրէջք։ Ընկերության հաղորդագրության մեջ նշվում է, որ խնդիրը կապված է եղել օդաչուների խցիկի ապակու հետ, սակայն օդանավը անվտանգ վայրէջք է կատարել, և ոչ ոք չի տուժել։

Վայրէջքից հետո ինքնաթիռը հանվել է շահագործումից՝ տեխնիկական ստուգման նպատակով, իսկ ուղևորները տեղափոխվել են մեկ այլ չվերթով։ Նմանատիպ դեպք էր գրանցվել նաև հոկտեմբերին, երբ ռուսական Superjet ինքնաթիռը հարկադիր վերադարձ էր կատարել օդանավակայան՝ դիմապակու վրա առաջացած ճաքի պատճառով։