Չինաստանը պատրաստվում է օգնել Ռուսաստանին՝ ստեղծելով գազի «ստվերային նավատորմ»

Չինաստանը սկսել է ձևավորել սեփական ստվերային նավատորմը, որը կօգտագործվի ռուսական «Արկտիկ ՍՊԳ-2» նախագծից ստացվող հեղուկ բնական գազի մատակարարման համար։ Այս մասին հայտնում է Bloomberg-ը՝ նշելով, որ քայլը ուղղված է ԱՄՆ խիստ սահմանափակումները շրջանցելուն։

Ըստ աղբյուրի՝ չինական ընկերությունները կրկնում են ռուսական և իրանական փորձը՝ օգտագործելով նույն սխեմաները, ինչ նավթային ստվերային տանկերները․ նավերը անջատում են իրենց տեղորոշման համակարգերը, երբ մոտենում են նավահանգիստներին, իսկ դրանց սեփականատերերն են դառնում կարճաժամկետ «մեկօրյա» ընկերություններ։ Օրինակ՝ CCH Gas տանկերը, որը տեղափոխել է ռուսական գազի առաջին խմբաքանակը, գրանցված է CCH-1 Shipping անունով ընկերությունում, որի հասցեն համընկնում է բիզնեսի ձևական գրանցմամբ զբաղվող կազմակերպության՝ Samxin Secretarial Services հասցեին։

Ինչպես գրում է Bloomberg-ը, նման անթափանց սեփականատիրական կառուցվածք գազատար նավերի ոլորտում հազվադեպ է, քանի որ դրանց թիվը շատ քիչ է․ աշխարհում կա շուրջ 8000 նավթային տանկեր, բայց միայն մոտ 800 գազատար։ Այս պահին Ռուսաստանի ստվերային նավատորմում ընդգրկված է մոտ տասնյակ նավ, որոնք ձևականորեն գրանցված են օֆշորային ընկերություններում։

Հրապարակման տվյալներով՝ ռուսական ՍՊԳ-ն այժմ ընդունվում է Չինաստանի Բեյհայ նավահանգստում, որը, ենթադրաբար, իշխանությունները առանձնացրել են հատուկ այս նպատակով։ Այդտեղ արդեն հասել է առնվազն տասն ռուսական նավ՝ շրջանցելով արևմտյան պատժամիջոցները։