Լավրովը հայտարարել է Ռուսաստանի՝ Բուդապեշտում գագաթնաժողով անցկացնելու պատրաստակամության մասին

Ռուսաստանը շարունակում է պատրաստ լինել Բուդապեշտում գագաթնաժողով անցկացնելուն, և Մոսկվայի ու Վաշինգտոնի միջև շփումները շարունակվում են, հայտարարել է Ռուսաստանի արտաքին գործերի նախարար Սերգեյ Լավրովը, հաղորդում է ՏԱՍՍ-ը։

Նախարարը հարցազրույց է տվել իտալական Corriere della Sera թերթին, որը թերթը հրաժարվել է հրապարակել։ Այնտեղ Լավրովը նշել է, որ Ռուսաստանը պատրաստ է Հունգարիայի մայրաքաղաքում հյուրընկալել ռուս-ամերիկյան երկրորդ գագաթնաժողովը, եթե այն իսկապես հիմնված լինի Ալյասկայում կայացած հանդիպման լավ մշակված արդյունքների վրա։ Գագաթնաժողովի ամսաթիվը դեռևս նշանակված չէ, և երկու երկրների միջև շփումները շարունակվում են։

Արտգործնախարարը կեղծ է որակել բրիտանական Financial Times թերթի այն լուրը, որ Բուդապեշտի գագաթնաժողովի չեղարկումը կապված է Ռուսաստանի կողմից ներկայացված Ուկրաինայի վերաբերյալ ենթադրյալ հուշագրի հետ։ Լավրովի խոսքով՝ հրապարակումը միտումնավոր խեղաթյուրել է իրադարձությունների էությունն ու հաջորդականությունը՝ ամեն ինչում Ռուսաստանին մեղադրելու և ԱՄՆ նախագահ Դոնալդ Թրամփին շեղելու կայուն, երկարաժամկետ խաղաղության իր առաջարկած ուղուց, այլ ոչ թե անհապաղ հրադադարից, որը նպատակ ունի Կիևին հանգիստ տալ և Ուկրաինային զենք մատակարարել։