Գլխավոր վարկածը՝ տեխնիկական անսարքություն. բացահայտվում են Վրաստանում կործանված թուրքական ինքնաթիռի մանրամասները

Վրաստանում թուրքական զինուժին պատկանող C-130 ռազմական բեռնատար ինքնաթիռի կործանման գործով հետաքննությունը կենտրոնացած է տեխնիկական անսարքության վարկածի վրա։ Թուրքական Karar պարբերականի տեղեկությամբ՝ դեպքի քննությանը մասնակցում է շուրջ 70 մասնագետ, այդ թվում՝ Թուրքիայի օդային ուժերի 46 հոգանոց հատուկ խումբ, որը շարունակում է աշխատանքը կործանման վայրում։ Հայտնաբերված ֆյուզելյաժի մասերը կուղարկվեն Թուրքիա՝ հետազոտման համար, իսկ ինքնաթիռի սև արկղն արդեն գտնվում է թուրք փորձագետների ձեռքում։

Հրապարակման համաձայն՝ կործանման վայրի ուսումնասիրությունից և սոցիալական ցանցերում տարածված տեսանյութերից երևում է, որ հարվածից առաջ ինքնաթիռի քիթն ու պոչը լիովին բաժանվել են։ Փորձագետները շուտով կներկայացնեն դրանց անջատման հանգամանքների վերլուծությունը։

Հիշեցնենք, որ ավելի վաղ հայտնաբերվել էին բոլոր 20 թուրք զինծառայողների մարմինները, որոնք զոհվել էին C-130 ռազմական բեռնատարի կործանման հետևանքով։