ՀՀ-ն ապրում է իր վերջին 500 տարվա պատմության լավագույն շրջանը, սա կարևոր է տեսնել. Փաշինյան

Ընդհանրապես կարծում եմ, որ մենք պետք է կարողանանք պաշտպանել այսօրվա Հայաստանը, որովհետև այսօրվա Հայաստանը շատ ավելի ուժեղ, շատ ավելի ինքնավստահ պետություն է, ավելի պետություն է, քան երբևէ։ Այս մասին, այսօր՝ նոյեմբերի 13–ին, ԱԺ–ում 2026 թվականի բյուջեի նախագծի քննարկման ժամանակ ամփոփիչ իր ելույթում նշեց վարչապետ Նիկոլ Փաշինյանը։

«Այսօրվա Հայաստանը մի պետություն է, որի ճակատագրի ղեկը գտնվում է հենց իր և իր ժողովրդի ձեռքին։ Ես համոզված եմ, որ այս իրադրությունը ոչ թե պահպանվելու է, այլ զարգանալու է, որովհետև դա պատմական շրջադարձ է։ Այն ինչ որ հիմա տեղի է ունենում, պատմական շրջադարձ է, Հայաստանը իր պատմության ընթացքում պետություն լինելու, բարեկեցիկ լինելու, երջանիկ լինելու, անկախ լինելու, անվտանգ լինելու, երբեք այսպիսի շանս չի ունեցել։ Խոսքը վերջին հինգ տարվա մասին չի, խոսքը վերջին 500 տարվա մասին է։

Այո, պետք է խոստովանել, որ մենք այդ խնդիրը լուծել ենք շատ դառը, դաժան փորձությունների միջով անցնելով։ Մենք այս անկախությունը ձեռք ենք բերել մեր նահատակների կյանքի գնով։ Եվ այսօրվա Հայաստանը, որը ապրում է, Հայաստանը ապրում է իր վերջին 500 տարվա պատմության լավագույն շրջանը։ Եվ շատ կարևոր է սա տեսնել։ Հայաստանի Հանրապետությունը, և Հայաստանի ժողովուրդը պետք է ամուր կառչի մեր նորընծա տեսողությունից և մեր նորընծա իմացությունից։ Փառք նահատակներին և կեցցե Հայաստանի Հանրապետությունը։ Շնորհակալ եմ»,– իր խոսքն ամփոփեց վարչապետը։