Եվրոպան ավելացրեց ռուսական գազի ներկրումները

Եվրոպական միությունը 2025 թվականի հունվար-սեպտեմբեր ամիսներին 1,6%-ով ավելացրել է ռուսական գազի գնումները՝ հասնելով 10,6 մլրդ եվրո, հայտնում է ՏԱՍՍ-ը՝ վկայակոչելով Եվրոստատի տվյալները։ Այդ գումարից 4,6 մլրդ եվրոն ուղղվել է խողովակաշարային գազի և 6 մլրդ եվրոն՝ հեղուկացված բնական գազի (LNG) գնումներին։

Սեպտեմբերին եվրոպական գլխավոր LNG ներմուծողները Ռուսաստանից եղել են Ֆրանսիան (183 մլն եվրո), Նիդերլանդները (99 մլն) և Բելգիան (36 մլն)։ Հունվար-օգոստոս ամիսներին Եվրոպան ավելացրել է LNG-ի ներկրումը 24%-ով՝ հասնելով ռեկորդային 92,8 միլիարդ խմ-ի։ Ռուսական գազի մասնաբաժինը պաշտոնապես չի նշվել, սակայն 2024-2025 թվականների ջեռուցման սեզոնի արդյունքներով Ռուսաստանը զբաղեցրել է երկրորդ հորիզոնականը՝ զիջելով միայն ԱՄՆ-ին։

Այս ցուցանիշները դիտարկվում են այն պայմաններում, երբ ԵՄ-ն հայտարարում է ռուսական էներգակիրներից հնարավորինս արագ հրաժարվելու մտադրության մասին։ Արտահանման ավելցուկի և գլոբալ հեղուկացված գազի շուկայում գների անկման կանխատեսումների ֆոնին, ԱՄՆ-ն ճնշում է գործադրում Եվրոպայի վրա՝ արագորեն նվազեցնելու ռուսական գազի ներկրումները։