Նախկին նախագահներին մեղադրանք առաջադրած Հրաչյա Մուշեղյանը կշարունակի մնալ կալանքի տակ

«Մարտի 1»-ի գործով քննչական խմբի նախկին ղեկավար, այժմ՝ փաստաբան Հրաչյա Մուշեղյանի կալանավորման որոշումը մնացել է անփոփոխ։ Վերաքննիչ քրեական դատարանը՝ դատավոր Գրիգոր Հովհաննիսյանի նախագահությամբ, մերժել է Մուշեղյանի կալանավորման որոշման դեմ հատուկ վերանայմնան բողոքը։

«Փաստինֆո»-ն ավելի վաղ հայտնել է, որ ՀՀ երկրորդ և երրորդ նախագահներին մեղադրանք առաջադրած քննիչը՝ Հրաչյա Մուշեղյանը, որն այժմ փաստաբանական գործունեություն է իրականացնում, սեպտեմբերի 12-ին կալանավորվել է՝ Երևանի ընդհանուր իրավասության քրեական դատարանի դատավոր Ջոն Հայրապետյանի որոշմամբ։ Վերջինիս վարույթում է գտնվում Հրաչյա Մուշեղյանի մասնակցությամբ գրանցված վթարի գործը։ Մուշեղյանի վերաբերյալ սա միակ քրեական վարույթը չէ։ Նա մեղադրյալի կարգավիճակ ունի նաեւ մեկ այլ քրեական վարույթով, որը դեռ նախաքննության փուլում է գտնվում։

Այդ վարույթը վերաբերում է բիզնես գործունեությանը՝ սկսած 2014թ, ինչն էլ հիմք է հանդիսացել, որ դատարանում քննվող վարույթով նրան կալանավորելու որոշում կայացվի։ Պաշտպանների դիտարկմամբ՝ այս մեղադրանքը Մուշեղյանը չի ընդունում, պնդում, որ ինքը չի կատարել, քանի որ այդ ընկերությունը գնել է 2023թ․։

Վերաքննիչ քրեական դատարանն անփոփոխ է թողել առաջին ատյանի դատարանի որոշումը՝ մերժելով հատուկ վերանայման բողոքը։ «Փաստինֆո»-ն տեղեկացավ, որ պաշտպաններն օրերս դատական ակտի դեմ վճռաբեկ բողոք են ներկայացրել, որի վարույթ ընդունման վերաբերյալ որոշում դեռևս առկա չէ։

Զեկուցողը դատավոր Սերժիկ Ավետիսյանն է։