Հնարավոր է՝ արդեն այս շաբաթ․ Թրամփ

ԱՄՆ նախագահ Դոնալդ Թրամփի վարչակազմը հույս ունի մինչև ամսվա վերջ հասնել Ուկրաինայում հակամարտության կարգավորման շուրջ շրջանակային համաձայնագրի: Այս մասին հայտնում է Politico-ն՝ վկայակոչելով Սպիտակ տան աղբյուրը։

Պարբերականի տվյալներով՝ Թրամփի վարչակազմը շուտով կհրապարակի Ռուսաստանի և Ուկրաինայի միջև խաղաղ համաձայնագրի նոր նախագիծը, որը կոչված է վերջ դնել հակամարտությանը: «Սպիտակ տան բարձրաստիճան պաշտոնյան հայտարարել է, որ բոլոր կողմերը, ինչպես սպասվում է, կհամաձայնեցնեն հակամարտության դադարեցման մասին շրջանակային համաձայնագիրը մինչև այս ամսվա վերջ, իսկ հնարավոր է՝ արդեն այս շաբաթ», - ասվում է հրապարակման մեջ:

Նշվում է, որ խաղաղության ծրագիրը, որը բաղկացած է 28 կետից, արդյունք է օտարերկրյա պետությունների հետ ներդրումային և տնտեսական համագործակցության հարցերով ՌԴ նախագահի հատուկ ներկայացուցիչ Կիրիլ Դմիտրիևի և ԱՄՆ նախագահի հատուկ դեսպանորդ Սթիվեն Ուիթքոֆի եռօրյա բանակցությունների, որոնք տեղի են ունեցել հոկտեմբերի վերջին Մայամիում: Ընդ որում, համաձայնագրի նախագծի մշակմանը չեն մասնակցել ոչ Ուկրաինայի ներկայացուցիչները, ոչ նրա եվրոպացի դաշնակիցները։