«Հեքիաթային» ընթերցանություն դպրոցականների համար
Գիտություն և Մշակույթ
Երևանում «Դոմ Մոսկվի» կենտրոնի պատանի այցելուները օրերս կրկին համոզվեցին, թե որքան լավ և շահեկան է լինել բարեկիրթ, ազնիվ և վճռական, ինչպես նաև՝ որ բարին անխուսափելիորեն հաղթում է չարին։ Մայրաքաղաքի մի շարք դպրոցների աշակերտներին հյուր էր եկել Երևանի Ստանիսլավսկու անվան ռուսական թատրոնի դերասանուհի, ՀՀ վաստակավոր արտիստ Վերոնիկա Սարոյանը, որը ներկայացրեց «Ուսոնշա Բոգատիրշա» ռուսական ժողովրդական հեքիաթը։
«Ռուսաց լեզուն հեքիաթների միջոցով» շարքից այս միջոցառումը կազմակերպվել էր Ռուսաստանի մշակույթի օրերի շրջանակում՝ Մոսկվայի կառավարության, Մոսկվայի արտաքին տնտեսական և միջազգային հարաբերությունների վարչության, Մոսկվայի հայրենակիցների տան և Երևանում «Դոմ Մոսկվի» կենտրոնի ջանքերով։
Երեխաները ունկնդրեցին հեքիաթը այն մասին, թե ինչպես թագավորի կրտսեր որդի Իվանը՝ իր հնարամտության, բարեկրթության և քաջարի մարտիկ Ուսոնշա Բոգատիրշայի օգնությամբ, կարողացավ իր հիվանդ հոր համար հայթայթել երիտասարդացնող խնձորներ և կենաց ջուր՝ հաղթահարելով չարակամ եղբայրների խարդավանություններն ու, ի վերջո, գտնելով իր երջանկությունը։
Միջոցառման ավարտին երեխաները մասնակցեցին հեքիաթի քննարկմանը՝ կիսվելով իրենց քաղած դասերով։
«Ինձ դուր եկավ Ուսոնշա Բոգատիրշայի մասին հեքիաթը, որը ես երբեք չէի լսել։ Ինձ նաև դուր եկավ այն, որ վերջում մենք գիրք նվեր ստացանք, որը ես անպայման կկարդամ», – ասաց Յուրա Բլինովը։
Մայակովսկու անվան թիվ 7 դպրոցի ռուսաց լեզվի ուսուցչուհի Ալլա Սանտոյանը ևս կիսվեց իր դրական տպավորություններով. «Նման հանդիպումները և կենդանի շփումը արվեստագետների հետ շատ նպաստավոր են երեխաների համար։ Մի բան է ինքնուրույն հեքիաթ կարդալը, և բոլորովին այլ բան՝ այն լսել պրոֆեսիոնալ դերասանուհու մատուցմամբ։ Պետք է ասեմ, որ «Դոմ Մոսկվիի» յուրաքանչյուր միջոցառում տոն է մեր աշակերտների համար. նրանք հաճույքով են գալիս այստեղ՝ սպասելով հերթական անակնկալին»։
«Հաճելիորեն զարմացած եմ, որ, հակառակ այն տարածված կարծիքին, թե այսօրվա երեխաների կրթվածությունն ու դաստիարակությունը պատշաճ մակարդակի վրա չէ, այս հանդիպման ընթացքում իմ լսարանը ցուցաբերեց նախանձելի մտածողություն և գիտակություն», – նշեց դերասանուհի Վերոնիկա Սարոյանը։
«Առանձնակի ոգևորող է, երբ մեզ հյուր են գալիս երեխաները։ Տեսնելով, թե որքան ոգեշնչված էին նրանք հեքիաթասացի հետ շփվելու հնարավորությունից, մենք պատրաստ ենք նման միջոցառումներ հնարավորինս հաճախ անցկացնել՝ նպաստելով նրանց մեջ ընթերցանության հանդեպ հետաքրքրության ձևավորմանը, ինչպես նաև ռուսաց լեզվի և մշակույթի հետ ծանոթությանը», – նշեց Երևանում «Դոմ Մոսկվի» կենտրոնի տնօրեն Հայկ Մելիքյանը։
ՈՒՂԻՂ ԵԹԵՐ
Ամենադիտված 
Մարտի 20-ին կդադարեցվի ջրամատակարարումը. հասցեներ
