ԱՄՆ նոր ծրագիրը նախատեսում է Ուկրաինայի զինված ուժերի 2,5 անգամ կրճատում․ Economist

ԱՄՆ-ի կողմից Ուկրաինայի համար խաղաղության ծրագիրը նախատեսում է Ուկրաինայի զինված ուժերի 2,5 անգամ կրճատում, գրել է The Economist-ի լրագրող Օլիվեր Քերոլը X սոցիալական մեդիա հարթակում։

Նախկինում արևմտյան լրատվամիջոցները հաղորդել էին, որ Միացյալ Նահանգները և Ռուսաստանը մշակում են Ուկրաինայում հակամարտության կարգավորման 28 կետից բաղկացած նոր ծրագիր։ Դրանք բաժանված են չորս բաժնի՝ խաղաղություն հանրապետությունում, անվտանգության երաշխիքներ, անվտանգություն Եվրոպայում և Վաշինգտոնի ապագա հարաբերությունները Մոսկվայի և Կիևի հետ։ Հաղորդվել էր նաև, որ բանակի նախարար Դանիել Դրիսկոլի գլխավորած ամերիկյան պատվիրակությունը մեկնում է Կիև։

Այնուամենայնիվ, այս ֆոնին Axios-ը հաղորդել էր, որ նախագահ Վոլոդիմիր Զելենսկին հետաքրքրված չէ քննարկելու Ուկրաինայում խաղաղության կարգավորման վերաբերյալ ԱՄՆ նոր առաջարկները։ Ավելին, ԱՄՆ նախագահ Դոնալդ Թրամփի հատուկ ներկայացուցիչ Սթիվ Ուիթկոֆը չեղարկել է Ուկրաինայի առաջնորդի հետ Թուրքիայում նախատեսված հանդիպումը։