Զախարովան Լեհաստանի որոշումը բացատրել է «վայրենի ռուսաֆոբիայով»

ՌԴ ԱԳՆ պաշտոնական ներկայացուցիչ Մարիա Զախարովան հայտարարել է, որ Գդանսկում Ռուսաստանի գլխավոր հյուպատոսության փակումը հանդիսանում է «վայրենի ռուսաֆոբիայի» հերթական դրսևորում։ Այս մասին նա հայտնել է բրիֆինգի ընթացքում՝ արձագանքելով Վարշավայի վերջին որոշմանը։

Զախարովայի խոսքով՝ Լեհաստանի իշխանությունների այս քայլը դիտվում է որպես երկու երկրների հարաբերությունների հետագա քայքայմանն ուղղված նպատակային քաղաքականություն։ Նա ընդգծել է, որ Մոսկվան պատրաստվում է տալ «հայելային պատասխան»՝ սահմանափակելով Լեհաստանի դիվանագիտական ներկայությունը Ռուսաստանում։

Նոյեմբերի 19-ին Լեհաստանի ԱԳ նախարար Ռադոսլավ Սիկորսկին հայտարարել էր, որ Գդանսկում գտնվող Ռուսաստանի վերջին գլխավոր հյուպատոսությունը փակվում է՝ որպես պատասխան նախորդ շաբաթավերջին երկաթուղում տեղի ունեցած դիվերսիայի համար։ Իսկ ՌԴ-ի ժամանակավոր հավատարմագրված ներկայացուցիչը՝ Անդրեյ Օրդաշը, լեհական կողմի մեղադրանքները անվանել էր «խենթություն և անհեթեթություն»։