Bloomberg․ ԱՄՆ-ի առաջարկած խաղաղ պլանը ներառում է Ռուսաստանի նկատմամբ պատժամիջոցների չեղարկումը

Bloomberg-ը, հղում անելով իր աղբյուրներին, գրում է, որ ԱՄՆ-ի կողմից առաջարկվող Ուկրաինայի հակամարտության կարգավորման նոր պլանը նախատեսում է Ռուսաստանի նկատմամբ սահմանված պատժամիջոցների  չեղարկում։ Հրապարակման մեջ նշվում է, որ առաջարկի բաղադրիչներից մեկը հենց այդ սահմանափակումների հանումն է, սակայն չի հստակեցվում՝ որ կոնկրետ միջոցների մասին է խոսքը։

Նյութում հաղորդվում է նաև, որ ամերիկագետ Պավել Դուբրավսկու կարծիքով՝ ռուս-ամերիկյան այս պլանի վերաբերյալ տեղեկատվության արտահոսքը, ամենայն հավանականությամբ, չէր եղել պատահական։ Նրա համոզմամբ՝ արտահոսքի նպատակը կարող էր լինել լրացուցիչ ճնշում գործադրել Ուկրաինայի վրա՝ բանակցային գործընթացում որոշումներ պարտադրելու նպատակով։

Ավելի վաղ հայտնի էր դարձել, որ Եվրամիության մի շարք երկրներ դեմ են հանդես եկել առաջարկվող խաղաղ պլանին՝ մտահոգվելով, որ Ուկրաինայի տարածքային զիջումները կամ զինաթափման մասով պարտավորությունները կարող են ընկալվել որպես Կիևի կապիտուլյացիա։ ԵՄ երկրները պնդում են, որ խաղաղ գործընթացը չի կարող իրականացվել այն պայմաններով, որոնք նվազեցնում են Ուկրաինայի ինքնիշխանությունը։