Հայաստանի քաղաքացիական հասարակության ներկայացուցիչները ժամանել են Ադրբեջան

Հայաստանի քաղաքացիական հասարակության ներկայացուցիչները ժամանել են Ադրբեջան։ Այս մասին հայտնում է ԱՊԱ գործակալությունը։

Նշվում է, որ Ադրբեջանի և Հայաստանի քաղաքացիական հասարակության ներկայացուցիչները շարունակում են երկխոսությունը օգոստոսի 8-ին Վաշինգտոնում համատեղ հայտարարության ընդունումից հետո սահմանված խաղաղության օրակարգի շրջանակներում։

Հավելենք, որ նոյեմբերի 21-22-ը Հայաստանից 5 փորձագետ կգտնվեն Բաքվում՝ մասնակցելու կլոր սեղան-քննարկմանը։ Այդ նպատակով Երևան-Բաքու և Բաքու-Երևան չարտերային թռիչք կազմակերպելու համար Հայաստանի կառավարությունը շուրջ 18 մլն դրամ է հատկացրել։ Համապատասխան որոշումն ընդունվել է ՀՀ կառավարության նիստին։

Հիշեցնենք՝ հոկտեմբերի 21-ին ուղիղ չվերթով ադրբեջանցի փորձագետներ էին ժամանել Երևան՝ մասնակցելու քաղհասարակության ներկայացուցիչների միջև երկկողմ հանդիպմանը։

Հիշեցնենք, որ այսօր Հայաստանի քաղհասարակության հինգ ներկայացուցիչներ մեկնել են Բաքու։ Հայկական պատվիրակության կազմում են Երևանի մամուլի ակումբի նախագահ Բորիս Նավասարդյանը, քաղաքագետներ Արեգ Քոչինյանը, Նարեկ Մինասյանը, Սամվել Մելիքսեթյանն ու իրավապաշտպան Նաիրա Սուլթանյանը։ Ինչպես մամուլի հրապարակումներից ենք տեղեկանում պատվիրակությունները քննարկելու են մեդիա ոլորտին առնչվող հարցեր, ինչպես նաև սահմանազատմանն ու ճանապարհների ապաշրջափակմանն առնչվող հարցեր։ Նշենք, որ այս այցը պատասխան է 2025 թվականի հոկտեմբերի 21-22-ին ադրբեջանական պատվիրակության Հայաստանի մայրաքաղաք կատարած այցին։