Վորոնեժի հարավարևմտյան հատվածում հայտնաբերվել են ATACMS-ի խոցված հրթիռների բեկորները

Վորոնեժի մարզի ղեկավար Ալեքսանդր Գուսևը հայտնել է, որ նոյեմբերի 18-ին խոցված ամերիկյան ATACMS հրթիռների բեկորները հայտնաբերվել են քաղաքի հարավարևմտյան մասում՝ այգեգործական համայնքի տարածքում։ Նրա խոսքով՝ տեղում գտնվել են պայթյունավտանգ տարրեր, և տարածքը շրջափակվել է անվտանգության նկատառումներով։

Գուսևը նշել է, որ բեկորների մի մասը գտնվում է մոտ 150 մետր հեռավորության վրա բնակելի շինություններից, իսկ մյուսը՝ ամառանոցային տան մոտ։ Սակրավորները հայտնել են, որ զինամթերքի վնասազերծումը կիրականացվի հենց տեղում՝ տեղափոխման բարձր վտանգի պատճառով։

ՌԴ պաշտպանության նախարարությունը տեղեկացրել էր, որ Ուկրաինայի զինված ուժերը փորձել են Վորոնեժին հարվածել չորս ATACMS հրթիռներով, սակայն բոլորն էլ ոչնչացվել են հակաօդային պաշտպանության համակարգերի կողմից։ Վթարից տուժածներ չկան։