Axios-ը հրապարակեց ԱՄՆ-ի՝ Ուկրաինային տրվելիք անվտանգության երաշխիքների ամբողջական նախագիծը

Axios պորտալի լրագրող Բարակ Ռավիդը հրապարակել է ԱՄՆ-ի կողմից Ուկրաինային առաջարկվող անվտանգության երաշխիքների ամբողջական նախագծի տեքստը, համաձայն որի՝ Վաշինգտոնը նախատեսում է կիրառել ՆԱՏՕ-ի Հոդված 5-ի սկզբունքները՝ հարմարեցված ընթացիկ հակամարտության պայմաններին։ Փաստաթղթում նշվում է, որ շրջանակային համաձայնագրերը պետք է սահմանեն հրադադարի պայմանները Ուկրաինայի և Ռուսաստանի միջեւ, ինչպես նաև ամրապնդեն ԱՄՆ-ի ու եվրոպական դաշնակիցների անվտանգության պարտավորությունները։

Երաշխիքները նախատեսում են ԱՄՆ-ի քայլեր՝ Ուկրաինայի անվտանգության վերականգնման համար Ռուսաստանի կողմից հնարավոր հարձակման դեպքում։ Դրանք կարող են ներառել զինված ուժի կիրառման տարբերակները, հետախուզական և նյութատեխնիկական աջակցություն, ինչպես նաև տնտեսական ու դիվանագիտական միջոցներ՝ տարածաշրջանի կայունությունը վերականգնելու նպատակով։

Փաստաթուղթը նաև ընդգծում է, որ Ֆրանսիան, Մեծ Բրիտանիան, Գերմանիան, Լեհաստանը և Ֆինլանդիան Ուկրաինայի անվտանգությունը համարում են եվրոպական կայունության անբաժան մաս։ Այդ երկրները պարտավորվում են համագործակցել ԱՄՆ-ի հետ և համատեղ արձագանքել խաղաղության ցանկացած խախտման դեպքում։