Չարլզ III թագավորի եղբայրը մարմնավաճառուհիներին բերել է Բուքինգհեմյան պալատ

Չարլզ III թագավորի եղբայրը՝ նախկին արքայազն Էնդրյուն, մարմնավաճառուհիներին բերել է Բուքինգհեմյան պալատ և ժամանակ անցկացրել նրանց հետ իր անձնական սենյակներում։ Այս մասին «Դեյլի Միրոր»-ին պատմել է բրիտանական թագավորական ընտանիքի նախկին անվտանգության աշխատակից Փոլ Փեյջը։

Փեյջը 1998-ից 2004 թվականներին ապահովել է թագավորական ընտանիքի անդամների անվտանգությունը: Նրա խոսքով՝ իր հերթափոխներից մեկի ժամանակ անվտանգության աշխատակիցներին հրամայվել է թույլ տալ իրենց տաքսիին մտնել բակ՝ առանց զննման: Սակայն, այնուամենայնիվ, ոստիկանները կանգնեցրել են մեքենան:

Տաքսիում անվտանգության աշխատակիցները նկատեցին Էնդրյուին և երկու կանանց՝ կարճ կիսաշրջազգեստներով և լայն դեկոլտեով վերնաշապիկներով։ Ինչպես հիշում է Փեյջը, նրանք ծիծաղում էին արքայազնի հետ և հարբած տեսք ունեին։ Նրանց թույլատրվեց ներս մտնել։ Փեյջի գործընկերները պնդում էին, որ Էնդրյուն ժամանել էր մարմնավաճառների հետ։

Էնդրյուն տարիներ շարունակ հետապնդվել է անչափահաս աղջիկների նկատմամբ սեռական բռնության մեղադրանքներով: Այս տեսակի ամենաաղմկոտ սկանդալը կապված էր ամերիկուհի Վիրջինիա Ռոբերտս-Ջուֆրեի հետ, որը պնդում էր, որ իրեն 17 տարեկանում ստիպել են սեռական հարաբերություն ունենալ արքայազնի հետ: Երդման տակ հարցաքննվելուց խուսափելու համար Էնդրյուն համաձայնվել է նրան վճարել 12 միլիոն ֆունտ ստեռլինգ: Շատերը կարծում էին, որ դա անելով՝ նա փաստացի ընդունում է իր մեղքը:

Սկանդալից հետո արքայազնը հեռացվեց թագավորական ընտանիքի ավագ անդամի իր պարտականություններից, իսկ ավելի ուշ զրկվեց իր տիտղոսների և կոչումների մեծ մասից։ Ռոբերտս-Ջյուֆրի հուշագրությունների հրատարակումից առաջ արքայազնը կամավոր հրաժարվեց իր դքսության տիտղոսից։