Առաջին անգամ անցկացվեց «ՀՀ վարչապետի գավաթ» դպրոցականների լողի մրցաշարը

Դպրոցահասակ երեխաների շրջանում առողջ ապրելակերպի քարոզման և լող մարզաձևի մասսայականացման նպատակով Ծաղկաձորի մարզաբազայի լողավազանում կայացավ «ՀՀ վարչապետի գավաթ» դպրոցականների լողի մրցաշարի եզրափակիչ մրցաշարը:

Մրցաշարին մասնակցել է մոտ 1040 դպրոցական, որից 710-ը` մարզերից:

«ՀՀ վարչապետի գավաթ» դպրոցականների լողի մրցաշարի եզրափակիչն անցկացվում է երկու տարիքային խմբով` 3-6-րդ դասարաններ՝ 2014-2017 թվականներին ծնված աշակերտներ (8-12 տարեկան) և 7-12-րդ դասարաններ՝ 2008-2013 թվականներին ծնված աշակերտներ (13-17 տարեկան):

Եզրափակիչ փուլին մասնակցում են ՀՀ մարզերի և Երևան քաղաքի հավաքական թիմերը. յուրաքանչյուր տարիքային խմբում կա 4 տղա և 4 աղջիկ:  Այս փուլում առաջին և երկրորդ տարիքային խմբերի մասնակիցները մրցեցին համապատասխանաբար 8x50 մետր և 8x100 մետր փոխանցումալող և ազատ ոճ մրցաձևերում՝ խառը կազմով (4 աղջիկ և 4 տղա):

Յուրաքանչյուր տարիքային խմբում 1-ին, 2-րդ և 3-րդ տեղեր գրաված թիմերը պարգևատրվեցին ԿԳՄՍՆ համապատասխան կարգի հավաստագրերով, գավաթներով, հուշանվերներով մեդալներով և դրամական պարգևներով:
 
Պարգևատրման արարողությունը կատարեցին ՀՀ վարչապետ Նիկոլ Փաշինյանը, վարչապետի աշխատակազմի ղեկավար Արայիկ Հարությունյանը, ԿԳՄՍ նախարար Ժաննա Անդրեասյանը, Առողջապահության նախարար Անահիտ Ավանեսյանը:

ՀՀ վարչապետ Նիկոլ Փաշինյանը,  ողջունելով մասնակիցներին, մասնավորապես ասաց. 

«Ըստ էության, մրցաշարի արդյունքներում անակնկալ չկար: Որովհետև երկու տարիքային խմբում էլ առաջին տեղում Երևանի թիմն է: ՀՀ լողավազանների 90 և ավելի տոկոսը գտնվում է Երևանում:  Եվ  մրցաշարի ընթացքում մեղավորության զգացում ունեցանք, մեր այն մարզերի երեխաների համար, որոնք այդ նույն հնարավորություններից չեն օգտվում: Այս խնդիրների հետ բախվելով էլ գույքագրում ենք  այդ խնդիրները: Բայց մենք քաղաքական այդ որոշումը կայացրել ենք՝ բոլոր խորոշացված համայնքներում ունենալ 25 մետրանոց լողավազան: Մենք չենք պատրաստվում մեր խնդիրների առաջ խեղճանալ»,-ասաց վարչապետը: 

Նիկոլ Փաշինյանը հույս հայտնեց, որ լողորդներին կտեսնի նաև միջազգային մրցաշարերում: 

ԿԳՄՍ նախարար Ժաննա Անդրեասյանը հույս հայտնեց, որ մրցաշարը լավ հիմք է հետագա զարգացման համար:

«Մեզ համար կարևոր որոշում էր լողի մրցաշարն անցկացնելը: Բոլորովին պատահական չէ, որ դպրոցականների համար է անցկացվում մրցաշարը: Մեր նպատակն է մեր երեխաների շրջանում խրախուսել առողջ ապրելակերպը: Ուրախ եմ, որ առաջին անգամ այս ձևաչափով անցկացնելով՝ նախնական փուլերում ունեցանք 1040 մասնակից: Լողի հետ կապված ենթակառուցվածքների խնդիր ունենք, այդ իսկ պատճառով կարևոր արդյունք եմ համար, ու սա նաև ցույց է տալիս, թե որքան խնդիրներ ունենք լուծելու»,-լրագրողների հետ զրույցում ասաց ԿԳՄՍ նախարար Ժաննա Անդրեասյանը:

3-6-րդ դասարանների մրցաշարում լավագույն եռյակում իրենց տեղերը հաջորդաբար զբաղեցրեցին` Երևանի, Շիրակի ու Կոտայքի թիմերը: 

Իսկ 7-12-րդ դասարանում մեդալների արժանացան. առաջին տեղ՝  Երևան, երկրորդ տեղ՝ Շիրակ, երրորդ տեղ՝ Լոռի: 
1-ին տեղ գրաված թիմը պարգևատրվեց 4,000,000 ՀՀ դրամով, 2-րդ տեղը՝ 2,500,000 ՀՀ դրամով, իսկ 3-րդ տեղը՝ 1,500,000 ՀՀ դրամով: Մրցաշարի մրցանակային տեղեր գրաված աշակերտները ևս պարգևատրվեցին դրամական մրցանակներով.1-ին տեղ՝ (8 մասնակից) 150,000-ական ՀՀ դրամ, 2-րդ տեղ՝ (8 մասնակից) 100,000-ական ՀՀ դրամ, 3-րդ տեղ՝ (8 մասնակից) 75,000-ական դրամ:
Պարգևատրվեցին նաև հավաքական թիմերի պատասխանատուները` 1-ին տեղ՝ 150,000 ՀՀ դրամ, 2-րդ տեղ՝ 100,000 ՀՀ դրամ, 3-րդ տեղ՝ 75,000 ՀՀ դրամ:

Published by Armenpress, original at https://armenpress.am/hy/article/1235770