Իրանը հերքում է ԱՄՆ ի հետ բանակցությունների նախաձեռնությունը

Իրանի արտաքին գործերի նախարար Աբբաս Արաղչին հայտարարել է, որ վերջին օրերին չի շփվել ԱՄՆ հատուկ բանագնաց Սթիվ Վիթկոֆի հետ և իր կողմը որևէ բանակցություններ չի նախաձեռնել, հաղորդում են պետական լրատվամիջոցները: Այս հայտարարությունը հնչել է այն օրերին, երբ ԱՄՆ նախագահ Դոնալդ Թրամփը տեղեկացրել էր, որ դեպի Իրան է շարժվում նոր «արմադա» և հույս հայտնել, որ Թեհրանը կարող է համաձայնություն ձեռք բերել Վաշինգտոնի հետ:

Արաղչին ընդգծել է, որ միջնորդների միջոցով իրականացվող խորհրդակցությունները չեն համարվում բանակցություններ. «Մեր դիրքորոշումը պարզ է. բանակցությունները չեն կարող ընթանալ սպառնալիքների պայմաններում, և երկխոսությունը հնարավոր է միայն այն դեպքում, երբ այլևս չլինեն սպառնալիքներ և անհիմն պահանջներ», – նշել է նա:

Միևնույն ժամանակ, Իրանի նախագահ Մասուդ Պեզեշկյանը հայտնել է Սաուդյան Արաբիայի գահաժառանգ Մոհամմեդ բին Սալմանին, որ Թեհրանը ողջունում է ցանկացած գործընթաց, որը միջազգային իրավունքի շրջանակում կարող է կանխել պատերազմը տարածաշրջանում, հայտնում է reuters- ը: