Իրանը սպառնում է հարվածել ԱՄՆ ռազմական բազաներին՝ հնարավոր հարձակման դեպքում

Իրանի արտաքին գործերի նախարար Աբբաս Արաղչին հայտարարել է, որ Միացյալ Նահանգների կողմից Իրանի վրա հնարավոր հարձակման դեպքում Թեհրանը կպատասխանի համաչափ քայլերով՝ թիրախավորելով տարածաշրջանում տեղակայված ամերիկյան ռազմական բազաները։ Այդ մասին նա խոսել է Քաթարի մայրաքաղաք Դոհայում անցկացված Al Jazeera հեռուստաալիքի ֆորումի ընթացքում։

Նախարարը նշել է, որ Իրանը չի կարող ուղղակիորեն հարձակվել ԱՄՆ տարածքի վրա, սակայն Վաշինգտոնի ռազմական գործողության դեպքում կհարվածի տարածաշրջանում գտնվող ամերիկյան բազաներին։ Նրա խոսքով՝ նման գործողությունը չի դիտարկվի որպես հարձակում հարևան պետությունների դեմ, քանի որ թիրախում կլինեն բացառապես ԱՄՆ ռազմական օբյեկտներն ու ամերիկացի զինծառայողները։

Ավելի վաղ ԱՄՆ նախագահ Դոնալդ Թրամփը մեկնաբանել էր Իրանի հետ ընթացող բանակցությունները՝ նշելով, որ կողմերը մոտեցել են հնարավոր համաձայնության ավարտին։ Նրա խոսքով՝ Թեհրանի ներկայացուցիչների հետ հաջորդ հանդիպումը նախատեսվում է անցկացնել հաջորդ շաբաթվա սկզբին։