Իրան-ԱՄՆ միջուկային բանակցություններում առաջընթաց կա, բայց համաձայնությունը դեռ հեռու է

Իրանի և ԱՄՆ-ի միջև Ժնևում անցկացված միջուկային բանակցությունների երկրորդ փուլում կողմերը համաձայնության են եկել հիմնական «ուղղորդող սկզբունքների» շուրջ, սակայն վերջնական պայմանավորվածությունը դեռ հեռու է։ Այդ մասին հայտարարել է Իրանի արտգործնախարար Աբբաս Արաղչին, փոխանցում է Reuters-ը։

Բանակցությունները տեղի են ունենում լարված ֆոնին։ Իրանը ռազմական վարժանքների պատճառով ժամանակավորապես սահմանափակել է Հորմուզի նեղուցի մի հատվածում նավարկությունը՝ ընդգծելով, որ այդ ռազմավարական ուղին կարևոր դեր ունի համաշխարհային նավթի մատակարարումներում։ Միաժամանակ Վաշինգտոնը շարունակում է ճնշումը Թեհրանի վրա՝ տարածաշրջան ուղարկելով ռազմական ուժեր։

ԱՄՆ նախագահ Դոնալդ Թրամփը հայտարարել է, որ Իրանում իշխանափոխությունը կարող է լինել հնարավոր սցենարներից մեկը, իսկ երկրի գերագույն առաջնորդ այաթոլլա Ալի Խամենեին վստահեցրել է, որ նման փորձերը ձախողվելու են։ Բանակցություններին մասնակցել են նաև ԱՄՆ հատուկ բանագնաց Սթիվ Ուիտկոֆը և Ջարեդ Քուշները, իսկ միջնորդի դեր է կատարել Օմանը։