Իրանը բետոնե պաշտպանական շերտ է կառուցում ռազմական օբյեկտում՝ ԱՄՆ-ի հետ լարվածության ֆոնին

Իրանը բետոնե պաշտպանական կառույց է կառուցել Փարչինի ռազմական համալիրում՝ օդային հարվածներից պաշտպանվելու նպատակով․ այս մասին հայտնում է Al Jazeera-ն՝ հղում անելով արբանյակային լուսանկարներին։ Պատկերներից երևում է, որ նոր կառույցը ծածկվել է հողով, իսկ աշխատանքները ակտիվացել են այն վայրում, որը, ըստ տեղեկությունների, հարվածի էր ենթարկվել Իսրայելի կողմից 2024 թվականին։

Արբանյակային տվյալները նաև ցույց են տալիս, որ Իրանը փակել է թունելների մուտքերը Իսֆահանի և Նաթանզի միջուկային օբյեկտների տարածքում, որոնք նախկինում ռմբակոծվել էին ԱՄՆ-ի կողմից՝ Իսրայելի հետ 12-օրյա պատերազմի ընթացքում։ 

Զուգահեռաբար շարունակվում են դիվանագիտական ջանքերը․ Ժնևում ԱՄՆ-ի և Իրանի ներկայացուցիչները քննարկել են միջուկային ծրագրի շուրջ հնարավոր համաձայնության սկզբունքները, սակայն բեկում չի արձանագրվել։ Վաշինգտոնը սպառնում է ռազմական գործողություններով, եթե բանակցությունները ձախողվեն, իսկ Թեհրանը պնդում է, որ պատրաստ է քննարկել միայն միջուկային ծրագրի սահմանափակումները՝ պատժամիջոցների թուլացման դիմաց։