Իրանն ու Չինաստանը մոտ են գերձայնային հականավային հրթիռների գործարքին

Իրանն առաջընթաց է գրանցել Չինաստանից գերձայնային հականավային թևավոր հրթիռներ ձեռք բերելու շուրջ բանակցություններում։ Reuters-ի հաղորդմամբ՝ խոսքը չինական արտադրության CM-302 հրթիռների մասին է, որոնց գործարքը գտնվում է ավարտական փուլում, թեև մատակարարման ժամկետները դեռ հստակեցված չեն։ Մոտ 290 կմ հեռահարությամբ և ցածր, մեծ արագությամբ թռիչքի շնորհիվ պաշտպանական համակարգերից խուսափելու ունակությամբ այս հրթիռները կարող են էապես ուժեղացնել Իրանի հարվածային ներուժը և սպառնալիք դառնալ տարածաշրջանում տեղակայված ամերիկյան ռազմածովային ուժերի համար։

Աղբյուրների համաձայն՝ բանակցությունները սկսվել էին առնվազն երկու տարի առաջ, սակայն արագացել են Իսրայել-Իրան 12-օրյա պատերազմից հետո։ Գործարքի շրջանակում Չինաստան են այցելել Իրանի բարձրաստիճան զինվորական և պետական պաշտոնյաներ, այդ թվում՝ փոխպաշտպանության նախարար Մասուդ Օրաեին։ Չինական կողմը պաշտոնապես չի մեկնաբանել տեղեկատվությունը, իսկ Վաշինգտոնը հայտարարել է, որ Իրանի հետ հակամարտության շուրջ կա երկու տարբերակ՝ համաձայնություն կամ «կոշտ գործողություններ»։

Հնարավոր գործարքը համընկնում է այն պահին, երբ ԱՄՆ-ն խոշոր ռազմածովային ուժեր է կենտրոնացնում Իրանի մերձակայքում՝ այդ թվում ավիակիրներ և հարվածային խմբեր։ Վերլուծաբանների գնահատմամբ՝ CM-302 հրթիռների ձեռքբերումը կդառնա Իրանի սպառազինության զգալի արդիականացում՝ հատկապես անցած տարվա ռազմական բախումներից հետո թուլացած զինանոցը համալրելու համատեքստում։ Միաժամանակ նշվում է, որ Պեկինի և Թեհրանի ռազմական համագործակցության խորացումը կարող է բարդացնել ԱՄՆ-ի ջանքերը՝ սահմանափակելու Իրանի հրթիռային և միջուկային ծրագրերը։