Մեջքով դեպի Եվրամիությանը. Բրիտանիային քննադատում են Ատլանտիկայի երկու կողմերում

Մեծ Բրիտանիայի վարչապետ Դեվիդ Քեմերոնը ԵՄ-ից իր պետության դուրս գալու մասին արված հայտարարություններից հետո քննդատության առարկա է դարձել: Նախօրեին բրիտանացի վարչապետի արած հայտարարությունն այսօր քննարկում են թե՛ քաղաքական, թե՛ գործարար շրջանակներում:

Ինչպես գրում է The Wall Street Journal-ը, Դեվիդ Քեմերոնի հայտարարությունը նրա եվրոպացի գործընկերների կողմից խրախուսանքի չարժանացավ: Բրիտանացի վարչապետը ռիսկի է դիմում՝ իր դեմ քաղաքական թշնամիներ հավաքել Ատլանտիկայի երկու կողմերում էլ: Իսպանիայի արտգործնախարարը Քեմերոնի քաղաքականությունն անվանեց չափազանց վտանգավոր խաղ:

Քեմերոնի դիրքորոշումն ԱՄՆ-ին նույնպես չուրախացրեց: Օբամայի վարչակազմը քիչ ջանք չի գործադրել տնտեսական ճգնաժամի պայմաններում Եվրոպան միավորելու և հաշտեցնելու ուղղությամբ: Վաշինգտոնին ձեռնտու է, որ Անգլիան մնա ԵՄ-ի կազմում. գրում է թերթը:

Բրիտանական Guardian-ը գրում է, որ անգլիական գործարար հասարակությունը նույնպես դժգոհ է այդ քաղաքականությունից: Եվրամիությունից Մեծ Բրիտանիայի փախուստը նրանք գնահատում են որպես գլոբալ տնտեսությանը սպառնացող 5 աղետներից մեկը:

Հետաքրքիր է, որ այդ որոշմանը բավականին մեղմ է վերաբերվել Գերմանիայի կանցլեր Անգելա Մերկելը, հայտարարելով, որ պատրաստ է տրամաբանական փոխզիջումների: Բեռլինի նման փափուկ վերաբերմունքը հույս է տալիս, որ Գերմանիային կհաջողվի համոզել Լոնդոնին մնալ ԵՄ կազմում: