The National Interest-ը կասկածի տակ է դնում Իրանում իշխանափոխության արդյունավետությունը

Ամերիկյան The National Interest հանդեսի վերլուծաբան Ալեքս Մադաջյանը գրում է, որ Իրանում հնարավոր իշխանափոխությունը ինքնին չի երաշխավորում երկրի ներքին խնդիրների լուծում։ Նրա գնահատմամբ՝ անգամ ժողովրդավարության անցումը չի կարող ավտոմատ կերպով վերացնել տարիներով ձևավորված ներքին հակասությունները։

Հեղինակը նշում է, որ թեև ժողովրդավարությունը սկզբունքորեն դրական երևույթ է, սակայն «անհեթեթ է» կարծել, թե միայն քաղաքական համակարգի փոփոխությամբ կվերանա հասարակության ներսում առկա պառակտումը կամ կձևավորվի կայուն լիբերալ կարգ։ Մադաջյանի կարծիքով՝ Իրանում ռեժիմի փոփոխությունը չի արդարացնում Արևմուտքի կողմից արյան և ֆինանսական ռեսուրսների հնարավոր ծախսը։

Վերլուծաբանը հիշեցնում է «արաբական գարնան» փորձը՝ նշելով, որ ավտորիտար իշխանությունների տապալումը միշտ չէ, որ հանգեցրել է ազատ ու ժողովրդավարական կառավարման ձևավորման։ Ավելի վաղ ԱՄՆ նախագահ Դոնալդ Թրամփը կոչ էր արել Իրանի բնակիչներին տապալել Իսլամական Հանրապետության կառավարությունը։