Թեհրանը հայտարարում է՝ ունի տվյալներ Նեթանյահուի գտնվելու վայրի մասին

Իրանը հայտարարում է, որ տիրապետում է լայնածավալ հետախուզական տվյալների իսրայելական ռազմական օբյեկտների վերաբերյալ, այդ թվում՝ Իսրայելի վարչապետ Բենիամին Նեթանյահուի գտնվելու վայրի մասին։ Այս մասին ՏԱՍՍ-ի փոխանցմամբ հայտարարել է Իրանի զինված ուժերի գլխավոր հրամանատարի ավագ խորհրդական Ռահիմ Սաֆավին։ Նրա խոսքով՝ Իրանի տվյալների բազան «ամբողջությամբ թարմացված է», և իրանական կողմը գիտի, թե որտեղ է Նեթանյահուն անցկացնում նիստերը։

Սաֆավին ընդգծել է, որ Իրանի հետախուզությունը լիովին տեղեկացված է ինչպես Իսլամական Հանրապետության շուրջ գտնվող հնարավոր թիրախների, այնպես էլ իսրայելական և ամերիկյան օբյեկտների վերաբերյալ։ Հայտարարությունը հնչել է տարածաշրջանում սրվող լարվածության ֆոնին։

Ավելի վաղ Իսրայելի պաշտպանության բանակը հայտարարել էր, որ հարվածներ է հասցրել Թեհրանում մի շարք կառավարական շենքերի։ Մասնավորապես նշվել է, որ թիրախավորվել է Իրանի նախագահ Մասուդ Փեզեշքիանի նստավայրը, իսկ հարձակումը իրականացվել է մարտի 3-ի գիշերը։