Թեհրանը հերքում է ԱՄՆ-ի հետ գործարքից հրաժարվելու մասին հայտարարությունները

Իրանի արտաքին գործերի նախարարությունը հերքել է տեղեկությունները, թե Թեհրանը բանակցությունների ընթացքում հրաժարվել է ԱՄՆ-ի հետ հնարավոր գործարքից։ Ինչպես փոխանցում է IRNA գործակալությունը իր Telegram-ալիքում, ԱԳՆ պաշտոնական ներկայացուցիչ Իսմայիլ Բաղային այդ պնդումները անվանել է «սուտ»։

«Այն, ինչ ասվում էր բանակցային գործընթացի մասին՝ իբր մեզ վերջին փուլում ինչ-որ առաջարկ է ներկայացվել, և մենք այն չենք ընդունել, ոչ այլ ինչ է, քան սուտ», — ընդգծել է դիվանագետը։ Միևնույն ժամանակ Բաղային չի հստակեցրել, թե կոնկրետ ում հայտարարություններն է հերքում։

Փետրվարի 28-ին ԱՄՆ նախագահ Դոնալդ Թրամփը հայտարարել էր, որ Իրանը գրեթե պատրաստ էր համաձայնության հասնել, սակայն հետագայում հետ է կանգնել գործարքից։ Նույն օրերին ամերիկացի հատուկ բանագնաց Սթիվ Ուիթքոֆը նշել էր, որ բանակցությունների ձախողումն ու միջուկային համաձայնության անհնարինության գիտակցումն են հանգեցրել Իրանի դեմ հարձակմանը։