Իրանը պատերազմի երկրորդ օրը առաջարկել է ԱՄՆ-ին դադարեցնել ռազմական գործողությունները

Իրանը ԱՄՆ-ի դեմ ռազմական գործողությունների մեկնարկից հետո փորձել է քննարկել հակամարտության դադարեցման հնարավորությունը։ The New York Times-ի տվյալներով՝ գործողությունների երկրորդ օրը Իրանի հետախուզության ներկայացուցիչները կապ են հաստատել ԱՄՆ Կենտրոնական հետախուզական վարչության (ԿՀՎ) հետ և առաջարկել քննարկել պատերազմի ավարտի պայմանները։

Պարբերականի աղբյուրների փոխանցմամբ՝ Իրանի հետախուզությունը անուղղակի ուղիներով կապ է հաստատել ԿՀՎ-ի հետ՝ առաջարկելով բանակցություններ սկսել հակամարտությունը դադարեցնելու շուրջ։ Սակայն Իսրայելի պաշտոնյաները, որոնք ցանկանում են առավելագույն վնաս հասցնել Իրանի ռազմական ներուժին, կոչ են արել Վաշինգտոնին անտեսել այդ առաջարկը։

Հաղորդվում է նաև, որ ներկայումս ԱՄՆ-ը լուրջ չի ընդունում Իրանի առաջարկը։ Ավելի վաղ CNN-ը հայտնել էր, որ ԿՀՎ-ն դիտարկում է Իրանի արևմուտքում գործող քրդական ուժերին զենք մատակարարելու տարբերակը։