Իրանն ԱՄՆ-ին համեմատել է նացիստական Գերմանիայի հետ՝ IRIS Dena ֆրեգատի վրա հարձակման պատճառով

Իրանի արտաքին գործերի նախարարի տեղակալ Սաիդ Խաթիբզադեն հայտարարել է, որ ԱՄՆ-ի գործողությունները հիշեցնում են նացիստական Գերմանիայի վարքագիծը՝ մեկնաբանելով Շրի Լանկայի ափերի մոտ իրանական նավատորմի IRIS Dena ֆրեգատի վրա իրականացված հարձակումը։ Նրա խոսքով՝ նման գործողությունները անընդունելի են և հակասում են միջազգային իրավունքի հիմնարար սկզբունքներին։

Խաթիբզադեի խոսքով՝ նավը Շրի Լանկայի ջրեր էր ժամանել «հնդիկ գործընկերների հրավերով»՝ միջազգային զորավարժություններին մասնակցելու համար, և նրա ներկայությունը հիմնականում արարողակարգային բնույթ էր կրում։ Նա ընդգծել է, որ ֆրեգատը զինված չէր, և նման հարձակումներ պատմության մեջ տեղի են ունեցել միայն Երկրորդ համաշխարհային պատերազմի ժամանակ, երբ նացիստական ուժերը հարձակվում էին ռազմական գործողությունների գոտուց հեռու գտնվող քաղաքացիական նավերի վրա։

Իրանի ԱԳՆ փոխնախարարը նաև նշել է, որ Թեհրանը չի թողնի այս միջադեպը առանց արձագանքի։ Ավելի վաղ հաղորդվել էր, որ ԱՄՆ-ի կողմից Շրի Լանկայի ափերի մոտ իրականացված հարձակման հետևանքով IRIS Dena ֆրեգատի զոհերի թիվը գերազանցել է 100-ը։ ՄԱԿ-ում Իրանի մշտական ներկայացուցչությունը հայտարարեց, որ Վաշինգտոնի գործողությունները դիտարկում է որպես անխոհեմ հարձակում, որը խախտում է միջազգային իրավունքի և ծովային նավարկության ազատության հիմնարար սկզբունքները։