Իրանն արձագանքել է Մակրոնին՝ մեղադրելով երկակի ստանդարտների մեջ

Իրանի արտգործնախարար Աբբաս Արաքչին կոշտ քննադատության է ենթարկել Ֆրանսիայի նախագահ Էմանուել Մակրոնին՝ Կատարի էներգետիկ ենթակառուցվածքների վրա հարվածներին նրա արձագանքի համար։ Իրանցի պաշտոնյան իր X սոցիալական ցանցի էջում նշել է, որ Մակրոնը լռել է ԱՄՆ-ի և Իսրայելի կողմից Իրանի դեմ իրականացվող գործողությունների ժամանակ՝ չդատապարտելով նաև Իսրայելի հարվածները, որոնք վտանգի տակ են դրել միլիոնավոր մարդկանց առողջությունը։

Արաքչիի խոսքով՝ Ֆրանսիայի նախագահի ներկայիս «մտահոգությունը» պայմանավորված է ոչ թե Իրանի գազային օբյեկտների վրա Իսրայելի հարվածներով, այլ Թեհրանի պատասխան գործողություններով, ինչը նա բնութագրել է որպես ցավալի և երկակի մոտեցման դրսևորում։ Նրա այս հայտարարությունը հետևել է Մակրոնի հրապարակմանը, որտեղ վերջինս հայտնել էր Կատարի էմիր շեյխ Թամիմ բին Համադ Ալ Թանիի և ԱՄՆ նախագահ Դոնալդ Թրամփի հետ ունեցած զրույցի մասին՝ կոչ անելով դադարեցնել քաղաքացիական ենթակառուցվածքների դեմ հարվածները։

Միաժամանակ, տարածաշրջանային լարվածության ֆոնին Ռուսաստանի նախագահ Վլադիմիր Պուտինը և Իրանի նախագահ Մասուդ Փեզեշքիանը քննարկել են Մերձավոր Արևելքում ստեղծված իրավիճակը։ Կրեմլի ղեկավարը վերահաստատել է Ռուսաստանի դիրքորոշումը՝ կողմ արտահայտվելով հակամարտության հնարավորինս արագ դեէսկալացիային։