Թրամփը սպառնում է հարվածել աշխարհի խոշորագույն գազային հանքավայրին․ Մերձավոր Արևելքում լարվածությունը մտնում է նոր փուլ

ԱՄՆ նախագահ Դոնալդ Թրամփը սպառնացել է ոչնչացնել աշխարհի խոշորագույն նավթագազային հանքավայրերից մեկը՝ «Հարավային Փարսը», եթե Իրանը հարված հասցնի Կատարին։ Սպիտակ տան ղեկավարը հայտարարել է, որ նման սցենարի դեպքում ԱՄՆ-ը «կկործանի ամբողջ հանքավայրը»՝ խոստանալով աննախադեպ հզորությամբ հարված։ Նրա խոսքով՝ նույնիսկ Իսրայելի հնարավոր բողոքները չեն խոչընդոտի այդ գործողությանը։

Միաժամանակ հայտնի է դարձել, որ ԱՄՆ-ը և Իսրայելը արդեն հարվածներ են հասցրել «Հարավային Փարս» հանքավայրին Իրանի Ասալույե շրջանում, ինչի հետևանքով վնասվել են մի շարք գազամշակման գործարաններ։ Արաբական երկրները կտրուկ արձագանքել են՝ հայտարարելով, որ էներգետիկ ենթակառուցվածքների թիրախավորումը վտանգավոր է և կարող է խորացնել տարածաշրջանային ճգնաժամը։ Կատարի վարչապետի խորհրդական Մաջեդ ալ-Անսարին այդ քայլը բնութագրել է որպես «անպատասխանատու և վտանգավոր»։

Ռուսաստանում Թրամփի սպառնալիքները գնահատվել են որպես «բեկումնային պահ»․ այդպես է արձագանքել Ռուսաստանի նախագահի հատուկ ներկայացուցիչ Կիրիլ Դմիտրիևը։ Միևնույն ժամանակ իրավիճակը արդեն ազդել է համաշխարհային շուկաների վրա․ Brent տեսակի նավթի գինը կտրուկ աճել է՝ գերազանցելով 112 դոլարը մեկ բարելի համար։ Վերլուծաբանները զգուշացնում են, որ զարգացումները կարող են լուրջ հարված հասցնել գլոբալ էներգետիկ մատակարարումներին։