ԱԺ հանձնաժողովը քննարկել է ԵԱՏՄ–ԱՄԷ տնտեսական գործընկերության համաձայնագիրը

«Եվրասիական տնտեսական միության և դրա անդամ պետությունների՝ մի կողմից, և Արաբական Միացյալ Էմիրությունների՝ մյուս կողմից, միջև տնտեսական գործընկերության մասին» համաձայնագիրը քննարկվել է ԱԺ տարածաշրջանային և եվրասիական ինտեգրման հարցերի մշտական հանձնաժողովի՝ մարտի 20-ի արտահերթ նիստում:

ՀՀ էկոնոմիկայի նախարարի տեղակալ Նարեկ Հովակիմյանը տեղեկացրել է, որ համաձայնագիրը ստորագրվել է 2025 թվականին: Նպատակն է ազատականացնել ու պարզեցնել կողմերի միջև ապրանքների առևտուրը, աջակցել կողմերի միջև տնտեսական և առևտրային փոխգործակցությանը, ինչպես նաև խրախուսել կողմերի միջև առևտրի ընդլայնումը:

Համաձայնագրի կնքման արդյունքում ԵԱՏՄ անդամ պետությունները ստանում են մուտքի արտոնյալ պայմաններ ապրանքային անվանացանկի 86 տոկոսի չափով, որի արտահանման ծածկույթը դեպի Արաբական Միացյալ Էմիրություններ Եվրասիական տնտեսական միության համար կազմում է 98 տոկոս: Համաձայնագրի անբաժանելի մաս են նաև կից ցանկերը, որոնցում ներառված ապրանքատեսակների հանդեպ կողմերը պատրաստ են տրամադրել սակագնային արտոնություններ:

Փոխնախարարը տեղեկացրել է, որ Հայաստանից ԱՄԷ արտահանվող 270 ապրանքներից 217-ի համար համաձայնագրի ուժի մեջ մտնելուց հետո կսահմանվի մուտքի արտոնյալ ռեժիմ: Մեր երկրի կողմից ներկայացված առաջարկներում հիմնականում ներառված են այն ապրանքները, որոնք Հայաստանի Հանրապետության արտահանման առաջնային հետաքրքրություն ունեցող ապրանքներ են: Գյուղատնտեսական ապրանքների մասով ներառված են թարմ մրգերը, այդ թվում՝ ելակ, վայրի ելակ, թարմ լոլիկ, մրգահյութեր, մեղր, ջեմեր, շաքարով հանքային ջուր, կենդանի բույսեր, խնձոր, ծիրան և այլն: Նշված ապրանքատեսակների համար ԱՄԷ շուկայի ծավալը գնահատվում է մոտ 550 մլն ԱՄՆ դոլար:

Արդյունաբերական ապրանքների մասով ներառվել են այնպիսի ապրանքներ, ինչպիսիք են ալյումինե փայլաթիթեղը, ալյումինե համաձուլվածքները, բժշկական սարքերը, ռադիոէլեկտրոնային և ռադիոհեռարձակման սարքավորումները և այլն:

Նշվել է, որ Հայաստանից արտահանելու դեպքում այդ ապրանքների համար մաքսատուրք չի մուծվելու:

Մոնղոլիայի հետ փոխադարձ առևտրի դյուրացմանն ու խթանմանն է ուղղված նաև «Եվրասիական տնտեսական միության և դրա անդամ պետությունների՝ մի կողմից, և Մոնղոլիայի՝ մյուս կողմից, միջև ժամանակավոր առևտրային համաձայնագիրը վավերացնելու մասին» համաձայնագիրը: Այն եւս քննարկվել է հանձնաժողովի նիստում:

Համաձայնագիրը ստորագրվել է 2025 թվականին, կարգավորում է տնտեսական համագործակցության հարցերի լայն շրջանակ, մասնավորապես՝ մաքսային կարգավորումը, սանիտարական և բուսասանիտարական միջոցառումները և այլ բնագավառներին առնչվող խնդիրներ: Նախատեսվում է համաձայնագրի գործողության ժամկետը սահմանել երեք տարի՝ հետագայում եւս երեք տարով երկարաձգելու հնարավորությամբ:

Հանձնաժողովը դրական եզրակացություն է տվել օրենքների նախագծերին: Առաջարկվել է հարցերն ընդգրկել ԱԺ հերթական նիստերի օրակարգի նախագծում: