Լրագրողներն ու փաստաբանները այսօր նույն դաշտում են՝ անարդարությունների առաջնագծում

ՀՀ փաստաբանների պալատը լրագրողների հետ համատեղ երկօրյա աշխատաժողով է անցկացնում, որտեղ քննարկվում են անարդարությունների դեմ պայքարում համատեղ աշխատանքի առավել արդյունավետ ուղիները։

Պալատի նախագահ Սիմոն Բաբայանը գտնում է, որ այս երկու խիստ կարեւոր ոլորտում մասնագիտական փոխգործակցությունը մասնագետների միջեւ շատ ավելի էֆեկտիվ կարելի էր դարձնել ժամանակակից գործիքակազմի միջոցով։

Մեկնարկած աշխատաժողովի շրջանակում այսօր նախատեսվում է նաև հուշագրի ստորագրում ՀՀ փաստաբանների պալատի և Հայաստանի ԶԼՄ-ների ասոցիացիայի միջև՝ համագործակցությունն ավելի համակարգված դարձնելու նպատակով։

Օրակարգում ընդգրկված են մի շարք առանցքային թեմաներ՝ տեղեկատվության ստացման և տարածման իրավական հիմքերից մինչև առօրյա աշխատանքում առաջացող խնդիրներ։ Քննարկվում են նաև խոսքի ազատության սահմանները, տեղեկատվության հասանելիության մեխանիզմները, ինչպես նաև լրագրողների և փաստաբանների փոխհարաբերությունների նուրբ կողմերը։

ՀՀ փաստաբանների պալատի նախագահ Հարութ Ակունցը, անդրադառնալով նախաձեռնությանը, նշում է․ «Մենք ցանկանում ենք ստեղծել հարթակ, որտեղ լրագրողներն ու փաստաբանները միասին կկարողանան արձագանքել խնդիրներին և ապահովել իրավական աջակցություն»։ Փաստաբան Արա Զոհրաբյանի խոսքով՝ երկու մասնագիտական խմբերն էլ հաճախ հայտնվում են ճնշումների թիրախում․ «Եթե որևէ ԶԼՄ-ի նկատմամբ բիրտ ուժ է կիրառվում, պետք է գործի համատեղ մեխանիզմ»։ Քննարկումների ընթացքում լրագրողները բարձրաձայնում են իրենց առջև ծառացած խնդիրները, իսկ մասնագետները ներկայացնում են հնարավոր լուծումներ։ Նախատեսվում է նաև արագ արձագանքման հանձնախմբի ձևավորում, որը կգործի առավել օպերատիվ։

Մասնագետները ոչ միայն գետնի վրա` այսօր մեր իրականության մեջ կատարվող աննախադեպ դատական գործերի լուսաբանումներն են քննարկում, նաեւ միջազգային փորձի առանձնահատուկ դեպքերով ուսումնասիրում են իրավական նյութերի լուսաբանումը՝ հասկանալու, թե ինչպես կարելի է Հայաստանում բարելավել համագործակցությունը՝ այս երկու ոլորտների միջև։

Երկկողմ ներկայացուցիչները անհրաժեշտ են համարում ձևավորել ավելի սերտ և վստահելի համագործակցություն փաստաբանների և լրագրողների միջև, ինչը կարևոր նշանակություն ունի ինչպես իրավական համակարգի թափանցիկության, այնպես էլ հանրության տեղեկացվածության բարձրացման համար։

Մանե Գևորգյան