Բռնությունները շատ թանկ հաճույք են Լատինական Ամերիկայի համար. Der Standard

Ուսումնասիրությունները ցույց են տալիս, թե ինչպես են բռնությունները Լատինական Ամերիկայում ազդում երկրի տնտեսության վրա. գրում է ավստրիական պարբերականը: Օրինակ՝ միայն Ուրուգվայում, որը մայրցամաքի ամենախաղաղ երկիրն է, բռնության պատճառով երկիրը  տարեկան կորցնում է իր տնտեսության ՀՆԱ-ի 3%-ը:

Լատինական Ամերիկան երկրագնդի ամենավտանգավոր տեղն է գործադրվող բռնությունների տեսակետից: Սակայն որո՞նք են դրա սոցիալ-տնտեսական հետևանքները: Դրան է անդրադարձել Միջամերիկյան զարգացման բանկը, որի անցկացրած հետազոտությունների արդյունքները սարսափազդու են. բռնության գործոնը վճռորոշ է՝ նորածին երեխայի քաշից սկսած մինչև անշարժ գույքի արժեքի հարցում:

«Հանցագործությունն անմիջականորեն ազդում է ենթակառուցվածքների պրոֆիլակտիկայի և անվտանգության ապահովման համար անհրաժեշտ ծախսերի վրա»,-ասել է տնտեսագետ Աննա Կորբախոն Վաշինգտոնում իր ելույթի ժամանակ և հավելել,-սակայն ոչ անմիջական ծախսերը շատ ավելի բարձր են, քանի որ բռնության բարձր մակարդակը հասնում է պետական ինստիտուտների հանդեպ վստահությունը:

Չնայած Լատինական Ամերիկայում վերջին 10 տարվա ընթացքում զգալիորեն նվազել է գործազրկության և աղքատության մակարդակը, այնուամենայնիվ, աշխարհում այն մնում է բռնության ամենաբարձր մակարդակն ունեցող մայրցամաքը: Անհավասարությունն ու մարգինալիզացումը, ավանդական ընտանիքի կապերի քայքայումը, ինչպես նաև ոստիկանական և դատական համակարգի ոչ աղդեցիկ լինելն առաջնահերթ պատճառներ են հանդիսանում դրա համար: 2010թ. դրությամբ սպանությունների մակարդակը Լատինական Ամերիկայում հասնում էր 11%-ի, այսինքն՝ 100.000 բնակչին բաժին էր ընկնում 85 սպանության դեպք: Համեմատության համար նշենք, որ ԵՄ-ում այդ ցուցանիշը կազմում է 1.6:

Ըստ Միջամերիկյան զարգացման բանկի ուսումնասիրությունների՝ բռնություններից հատկապես տուժում են մայրերն ու երեխաները: Այն երեխաները, որոնց մայրերը բռնության զոհ են դարձել, ծննդյան ժամանակ մոտավորապես 2.5 կգ ավելի նվազ քաշ են ունենում, քան այլ երեխաներ: Բռնության ենթարկված կանանց մոտ մեծ է վիժման հավանականությունը: Դա նշանակում է, որ բռնությունը լուրջ խոչընդոտ է սոցիալական զարգացման ճանապարհին:

Եթե, օրինակ, Մեխիկոյի շրջանում բռնության ցուցանիշն աճում է 1%-ով, դա հանգեցնում է այդ շրջանում անշարժ գույքի արժեքի նվազմանը՝ մինչև 1.8 %: Հատկապես բռնություններով հայտնի շրջաններն ունեն գործազրկության ամենամեծ ցուցանիշն ու ներդրողների ամենաքիչ քանակը: Բացի այդ, նման վայրերը, ի տարբերություն ապահով շրջանների, օգտագործում են 6.8% պակաս էլեկտրաէներգիա: