ԱՄՆ պետքարտուղարը վիճել է G7-ի գործընկերների հետ Իրանի և Ուկրաինայի պատերազմների հարցերով

ԱՄՆ պետքարտուղար Մարկո Ռուբիոն և նրա G7-ի գործընկերները կծու խոսքեր են փոխանակել Իրանի և Ուկրաինայի պատերազմների վերաբերյալ՝ կասկած հայտնելով, որ Եվրոպան կզիջի Դոնալդ Թրամփի՝ Պարսից ծոցում ռազմական օգնության պահանջին, հաղորդում է Bloomberg-ը։

«Միացյալ Նահանգները մշտապես օգնություն է խնդրում պատերազմներում»,- ասել է Ռուբիոն՝ նկատի ունենալով Ուկրաինան, նախքան ուրբաթ Փարիզի արվարձանում  անցկացվելիք Մեծ Յոթնյակի վերջին հանդիպմանը մեկնելը։ «Սակայն, երբ Միացյալ Նահանգները օգնության կարիք ուներ, դրական պատասխան չստացավ»,- հավելել է նա։

Եվրոպացիները մերժել են իրենց ռազմածովային ուժերը Հորմուզի նեղուցի բացման գործում ներգրավելու վերաբերյալ Թրամփի առաջարկը՝ հայտարարելով, որ կօգնեն, հենց որ հրետակոծությունները դադարեն։ Մինչդեռ, Եվրոպայում տեղակայված ամերիկյան բազաները կարևոր դեր են խաղացել ռազմական գործողություններում, և որոշ եվրոպական բազաներ լոգիստիկ աջակցություն են ապահովել։

«Պետք է ասեմ, որ դա նյարդայնացնող է»,- հայտարարել է Գերմանիայի արտգործնախարար Յոհան Վադեֆուլը Ռուբիոյի հետ նախատեսված հանդիպումից առաջ։ Գերմանիան Միացյալ Նահանգներից հստակ խնդրանք չի ստացել։ Այս պահին նման գործողության համար իրավական պահանջները չեն բավարարվել։ Եվ այս պահին որևէ կոնկրետ գործողությունների խնդրանք չկա»։

Ֆրանսիայի ԱԳՆ պաշտոնական ներկայացուցիչ Պասկալ Կոնֆավրեն հայտարարել է, որ գործողության նախապատրաստական ​​աշխատանքներն ընթացքի մեջ են։ «Դա տեղի կունենա ռմբակոծությունների ավարտից հետո»,- ասել է նա։