Ռուբիոն և Կալլասը բախվել են G7-ում․ վիճաբանության պատճառը՝ Ռուսաստանի հարցում ճնշումը

ԱՄՆ պետքարտուղար Մարկո Ռուբիոն և եվրոպական դիվանագիտության ղեկավար Կայա Կալլասը սուր բանավեճ են ունեցել G7 երկրների արտգործնախարարների հանդիպման ժամանակ Ֆրանսիայում։ Axios-ի փոխանցմամբ՝ վեճը կապված է եղել Ռուսաստանի նկատմամբ ճնշման մակարդակի և Ուկրաինայի հակամարտության կարգավորման հարցում Վաշինգտոնի դերի շուրջ տարաձայնությունների հետ։

Հանդիպման ընթացքում Կալլասը քննադատել է ԱՄՆ-ին՝ պնդելով, որ Վաշինգտոնը բավարար կոշտություն չի ցուցաբերում Մոսկվայի նկատմամբ և հիշեցրել է Ռուբիոյին մեկ տարի առաջ արված հայտարարությունները։ «Անցել է մեկ տարի, իսկ Ռուսաստանը չի փոխվել․ ե՞րբ կսպառվի ձեր համբերությունը», — հարցրել է նա։ Ի պատասխան՝ Ռուբիոն բարձր տոնով հայտարարել է, որ ԱՄՆ-ն անում է առավելագույնը հակամարտությունը ավարտելու համար՝ ավելացնելով․ «Եթե կարծում եք, որ կարող եք ավելի լավ անել, արեք դուք, մենք մի կողմ կքաշվենք»։

Աղբյուրների համաձայն՝ վիճաբանությունը այնքան է սրվել, որ եվրոպացի մի շարք նախարարներ ստիպված են եղել միջամտել՝ հորդորելով շարունակել դիվանագիտական ջանքերը։ Սակայն ավելի ուշ Ռուբիոն լրագրողների հետ զրույցում հերքել է լարվածության մասին տեղեկությունները՝ պնդելով, որ հանդիպումը անցել է առանց բարձր ձայների կամ բացահայտ հակասությունների։