Հայ հարևանիս չդիպչես. բողոքի երթ Ստամբուլում՝ նվիրված հայ կանանց նկատմամբ բռնություններին

Շատ մտավորականներ և քաղաքական գործիչներ հունվարի 27-ին բողոքի երթ են կազմակերպել Ստամբուլի Սամաթիա թաղամասում՝ ի պաշտպանություն վերջերս արվարձանում հայ կանանց նկատմամբ կիրառված բռնություններին: Այս մասին նշում է Hurriyetdailynews պարբերականը:

Բողոքի երթի ժամանակ հայերին իրենց աջակցությունն էին հայտնում քրդերը, սիրիացիները, այլ կրոնական պահպանողականներ և փոքրամասնություններ: 

Բողոքի երթը կազմակերպվել էր որոշ ՀԿ-ների և Թուրքիայի գլխավոր հայկական կազմակերպության կողմից, մասնակցում էին պատգամավորներ՝ «Խաղաղություն և ժողովրդավարություն» կուսակցությունից Էրթուղրուլ Քուրքչուն, Սաբահաթ Թունջելը և Սիրի Սուեյա Օնդերը, «Ազատություն և համերաշխություն» կուսակցությունից՝ Ուֆուկ Ուրասը, ինչպես նաև Հրանտ Դինքի եղբայր Օրհան Դինքը: 

Բողոքի երթի մասնակիցների ձեռքին կային «Հայ հարևանիս չդիպչես», «Ատելությունը` ձեզ, մարդկությունը` մեզ», «Հայ ժողովրդի կողքին ենք, ռասիզմին տեղ չենք տալու» կարգախոսներով ցուցապաստառներ: 

Քյուչուքը նշել է, որ պետք է դատական հետաքննություն սկսվի, թե ինչու են բոլոր զոհերը հայ եղել: «Ես հուսով եմ, որ այս դիպվածներն արդյունավետ կերպով հետաքննության կենթարկվեն, և արդարությունը կվերականգնվի: Այն փաստը, որ հարձակման ենթարկվել են ծեր և անպաշտպան կանայք, ցույց է տալիս, որ այս դրդապատճառները եղել են ատելությունն ու վրեժը»: