Cumhuriyet. 2015-ին մնացել է 2 տարի, տեսնենք թուրքերն ի՞նչ կանեն

«2015-ին մնացել է 2 տարի: Տեսնենք Թուրքիան ներկայացնելու համար սպանված առաջին դիվանագետներին թուրք ժողովուրդը ինչպես ու ինչքա՞ն կհիշի»,- գրում է Թուրքական «Ջումհուրիյեթ» (Cumhuriyet) օրաթերթի սյունակագիր Ութքու Չաքըրօզերը: Անդրադառնալով 40 տարի առաջ ԱՍԱԼԱ-ի (Հայաստանի ազատագրության հայ գաղտնի բանակ - Armenian Secret Army for the Liberation of Armenia) զինյալների կողմից ոչնչացված Հայոց ցեղասպանությունը հերքող թուրք դինավանագետներ Լոս-Անջելեսի գլխավոր հյուպատոս Մեհմեթ Բայդարի և հյուպատոս Բահադըր Դեմիրի պատմությանը՝ հոդվածագիրը նշում է, որ պետք է սպանված թուրք դիվանագետների հիշատակի միջոցառումներ կազմակերպել: Ուշադրություն է հրավիրում այն բանի վրա, որ 2015-ին ընդառաջ հայերը նախապատրաստվում են համաշխարհային լայնամասշտաբությամբ նշել Հայոց ցեղասպանության 100-ամյա տարելիցը:

Հիշեցնենք, որ ԱՍԱԼԱ-ն 1980-ականներին դարձել էր հայոց պայքարի ու վրեժի խորհրդանիշը: ԱՍԱԼԱ-ն բնական հակազդեցությունն էր ցեղասպանությունից փրկվածների այն զավակների, որոնք տասնամյակներ շարունակ լռելուց հետո ստիպված եղան զենք բարձրացնել: ԱՍԱԼԱ-ն պայքարում էր ոչ միայն զենքով, այլև ուներ իր պաշտոնաթերթը՝ «Հայաստանը», որ լույս էր տեսնում հինգ լեզուներով՝ հայերեն, անգլերեն, արաբերեն, ֆրանսերեն և թուրքերեն: 10 տարվա ընթացքում ԱՍԱԼԱ-ի զինյալներն իրականացրեցին ավելի քան 200 հարձակում թուրք դիվանագետների և քաղաքական գործիչների դեմ աշխարհի տարբեր երկրներում: Այդ տարիներին թուրքական կառավարությունը գնաց ծայրահեղ քայլի. Անկարան սկսեց իր արտակարգ և լիազոր դեսպաններին զինել և հատկացնել զրահապատ մեքենաներ: 1990-ականների սկզբին ԱՍԱԼԱ-ն ընդհատակ անցավ, բայց երբեք չի հայտարարել իր գործունեությունը կասեցնելու մասին: