Սիրիայում պատերազմը կավարտվի, հենց որ Թուրքիան դադարի զենք մատակարարել ապստամբներին. Ասադ

Դամասկոսի Ռուադ պալատում արաբ հանրության առջև ելույթ ունենալիս Բաշար Ասադը հայտարարել է, որ Սիրիայի հակամարտությունն իր ավարտին կմոտենա 2 շաբաթ անց անմիջապես այն բանից հետո, երբ Թուրքիան դադարի իր տարածքի վրայով զենք և զինված գրոհայիններ մատակարարել Սիրիայի ապստամբներին. փոխանցում է Ալ Ախբար լիբանանյան պարբերականը:

Ասադն անդրադարձել է նաև Սիրիայի հարցում Մոսկվայի դիրքորոշմանը՝ նշելով, որ Ռուսաստանը, պաշտպանելով Սիրիան, պաշտպանում է իր շահերը, այլ ոչ թե գործող նախագահ Բաշար Ասադի ռեժիմը:

«Իսկ ինչ վերաբերում է ԱՄՆ-ին,-ասել է նախագահ Ասադը,-ապա Վաշինգտոնը դեռ պատրաստ չէ այս պահին կարգավորել սիրիական ճգնաժամը»:

Միաժամանակ, Սիրիայի ղեկավարը դրական է արտահայտվել ԱՄՆ-ի Պետքարտուղարության կողմից արմատական Ջաբհաթ ան Նուսրա՝ Նուսրայի ճակատ, իսլամիստական խմբավորումն ահաբեկչական կազմակերպությունների շարքն ընդգրկելու հարցի շուրջ՝ հայտարարելով, որ այդ խմբավորումն Ալ Քաիդայի ճյուղավորումներից է, և ինքը խոստանում է մոտ ապագայում ամբողջովին արմատախիլ անել նրանց գործունեությունը Սիրիայի տարածքում:

«Սիրիայի կառավարական բանակը հակամարտության 22 ամիսների ընթացքում թույլ չտվեց զինված խմբավորումներին ամբողջովին գրավել երկրի և ոչ մի նահանգ»,-նշել է Բաշար Ասադը: Նրա խոսքերով՝ այդ խմբավորումների գործունեությունը սահմանափակվում է միայն Թուրքիայի, Հորդանանի և Լիբանանի հետ սահմանակից մի քանի շրջանում, ինչպես նաև՝ մայրաքաղաք Դամասկոսին կից մի քանի կետում, որտեղից վերջին օրերին Սիրիայի բանակը մաքրում է նրանց:

Ասադը հավելել է, որ Դամասկոսն ապակայունացնելու բոլոր փորձերը խռովարարների կողմից տապալվել են, և այժմ բաց և ապահով են մայրաքաղաքի բոլոր ռազմավարական կետերը, այդ թվում՝ դեպի միջազգային օդանավակայան տանող մայրուղին:

Ասադը միաժամանակ հասկացրել է, որ ինքը շարունակելու է համագործակցել ՄԱԿ-ի և Արաբական պետությունների լիգայի հատուկ ներկայացուցիչ Լախդար Բրահիմիի հետ: