Լատվիայում ընկած անօդաչուները, ըստ ռուսական աղբյուրների, ուղղվել էին դեպի ռուսական նավահանգիստ

Ռուսական «Военная хроника» Telegram ալիքը հայտնել է, որ Լատվիայում ընկած անօդաչու թռչող սարքերը, ենթադրաբար, ուղղվել էին դեպի Ռուսաստանի Ուստ-Լուգա նավահանգիստը։ Խոսքը վերաբերում է Ռեզեկնե քաղաքի նավթաբազայի տարածքում կործանված դրոններին, որոնք ընկել են Ռուսաստանի սահմանից մոտ 40 կիլոմետր հեռավորության վրա։

Աղբյուրի փոխանցմամբ՝ Ռեզեկնեի նավթաբազան գտնվում է Ուստ-Լուգայից մոտ 350 կիլոմետր հեռավորության վրա, և ռուսական կողմը ենթադրում է, որ անօդաչուների վերջնական նպատակը հենց այդ ռազմավարական նավահանգիստն էր։ Ռազմական թղթակից Ալեքսանդր Կոցն էլ հայտարարել է, որ վերջին երկու ամիսների ընթացքում Բալթյան երկրներում ընկած ուկրաինական դրոնները ձևավորում են «բալթյան միջանցք», որը ձգվում է Ուկրաինայից մինչև Ֆիննական ծոց։

Ավելի վաղ լատվիական LSM.lv պորտալը հայտնել էր, որ մայիսի 6-ի լույս 7-ի գիշերը Լատվիայի արևելքում գտնվող Ռեզեկնե քաղաքի նավթաբազայի տարածքում կործանվել է անհայտ անօդաչու սարք։ Ըստ լրատվամիջոցի՝ երկրի տարածքում ընկել է առնվազն ևս մեկ դրոն, որի բեկորները մինչ այժմ չեն հայտնաբերվել։