Թրամփի և Վատիկանի լարվածության ֆոնին Ռուբիոն հանդիպելու է Հռոմի պապ Լեոյին

ԱՄՆ պետքարտուղար Մարկո Ռուբիոն մայիսի 8-ին Վատիկանում կհանդիպի Հռոմի պապ Լեոյին։ Reuters-ի փոխանցմամբ՝ հանդիպումը տեղի է ունենում բավական լարված մթնոլորտում, քանի որ ԱՄՆ նախագահ Դոնալդ Թրամփը վերջին շաբաթներին շարունակաբար քննադատում է կաթոլիկ եկեղեցու առաջնորդին՝ հատկապես Իրանի պատերազմի վերաբերյալ նրա դիրքորոշման պատճառով։ Սա լինելու է Վատիկանի և Թրամփի վարչակազմի բարձրաստիճան պաշտոնյայի առաջին հանդիպումը վերջին մեկ տարվա ընթացքում։

Հաղորդվում է, որ Հռոմի պապ Լեոն, ով պատմության մեջ առաջին ամերիկացի պապն է, կոշտ քննադատության է ենթարկել ԱՄՆ-ի և Իսրայելի ռազմական գործողությունները Իրանի դեմ և բազմիցս հանդես եկել խաղաղության կոչերով։ Դոնալդ Թրամփը, իր հերթին, հայտարարել էր, թե պապը «վտանգում է կաթոլիկներին» և սխալմամբ ակնարկել էր, թե նա աջակցում է Իրանի միջուկային ծրագրին։ Պապ Լեոն հերքել է այդ պնդումները՝ ընդգծելով, որ կաթոլիկ եկեղեցին մշտապես դեմ է եղել միջուկային զենքին և շարունակում է խաղաղության ուղերձ տարածել աշխարհում։

Reuters-ը գրում է, որ հանդիպումը կանցնի փակ դռների հետևում և կտևի մոտ 30 րոպե։ Դրանից հետո Ռուբիոն կհանդիպի նաև Վատիկանի պետքարտուղար, կարդինալ Պիետրո Պարոլինի հետ։ ԱՄՆ դեսպան Բրայան Բերչը հայտարարել է, որ զրույցը, հավանաբար, կլինի «անկեղծ և ուղիղ»։ Ռուբիոն Հռոմում նախատեսում է հանդիպել նաև Իտալիայի վարչապետ Ջորջա Մելոնիի հետ, որը նախկինում պաշտպանել էր պապին Թրամփի քննադատություններից։