Հայաստանը մամուլի ազատության ոլորտում տարածաշրջանում առաջատար է. Լրագրողներ առանց սահմանների

«Լրագրողներ առանց սահմանների»-ն հրապարակել է մամուլի ազատության ոլորտում աշխարհի ամենաազատ երկրների վարկանշային աղյուսակը:

Այդ աղյուսակի համաձայն՝ Հայաստանը մամուլի ազատության տեսակետից իր հարևան երկրների շարքում բավական առաջատար դիրքերում է: Այսպիսով՝ Հայաստանը բարելավել է իր դիրքերն անցյալ տարվա համեմատ՝ բարձրանալով 4 հորիզոնականով և զբաղեցնելով 74-րդ տեղը: Մամուլի ազատության առումով Հայաստանը գերազանցել է Վրաստանին (100-րդ հորիզոնական), Ադրբեջանին (156-րդ հորիզոնական), Թուրքիային (154-րդ հորիզոնական) և Իրանին (174-րդ հորիզոնական):

Աղյուսակի համաձայն՝ հյուսիսային Եվրոպայի երկրներն աշխարհում ամենաազատ մամուլն ունեն: Վարկանշային աղյուսակի առաջատար 3 հորիզոնականներում են Ֆինլանդիան, Նիդեռլանդները և Նորվեգիան: 4-րդ տեղում է Անդորրան, իսկ լավագույն հնգյակը եզրափակում է Լյուքսեմբուրգը:

Մամուլի ազատությունը, ի տարբերություն նախորդ տարիների, բավականին անհուսալի վիճակում է այնպիսի երկրներում, ինչպիսիք են Հունգարիան (56-րդ տեղ) և Հունաստանը, որը 70-րդ տեղից իջել է մինչև 84-րդ հորիզոնական:

«Լրագրողներ առանց սահմանների» կազմակերպության կողմից սուր քննադատության է արժանացել Թուրքիան: Նրա դիրքերը բավականին անմխիթար են՝ ըստ կազմակերպիչների: Ուսումնասիրվող 179 երկրից Թուրքիան հայտնվել է 154-րդ տեղում: Ռազմական ռեժիմի հաստատումից ի վեր Թուրքիայում երբեք այսքան շատ լրագրողներ չեն բանտարկվել, որքան այսօր. նշում են նրանք: Ռուսաստանն (148) ու Ուկրաինան (126) նույնպես նախորդ տարվա համեմատ գլորվել են ավելի ստորին հորիզոնականներ: Ռուսաստանում հատկապես Վլադիմիր Պուտինի նախագահ վերընտրվելուց հետո երկրում ծայր առած բողոքի ձայներն իշխանությունների կողմից դաժանորեն լռեցվում են, իսկ համացանցի նկատմամբ հսկողությունը խստացվում է:

Իրենց դիրքերը քիչ թե շատ բարելավել են «Արաբական գարուն» վերապրած մերձավորարևելյան երկրները: Եգիպտոսը բարելավել է իր դիրքերը՝ 166-ից բարձրանալով 158-րդ հորիզոնական: Այստեղ առաջվա նման դեռևս շարունակվում են լրագրողների և բլոգերների նկատմամբ հալածանքներն ու բանտարկությունները: Լիբիան Քադաֆիի ռեժիմի տապալումից հետո 23 հորիզոնականով բարձրացել է՝ զբաղեցնելով 131-րդ տեղը: Այս առումով Սիրիան նախորդ տարվա նման մնում է հետնապահ դիրքերում՝ զբաղեցնելով ոլորտում վերջից 4-րդ հորիզոնականը և զիջելով միայն Թուրքմենստանին, Հյուսիսային Կորեային և Էրիթրեային:

Ադրբեջանն (156) ու Բելառուսը (157) անցյալ տարի ընդդիմության նկատմամբ զանգվածային բռնություններ գործադրելու արդյունքում ցած էին իջել իրենց հորիզոնականներից: Այս տարի այս երկրները պարզապես նորից գրավել են իրենց համար կայուն անմխիթար հորիզոնականները: