Հորդանանը ԱՄՆ-ի համար Սիրիա ներխուժելու կարևոր հենակետ է. Der Standard

Հորդանանը ԱՄՆ-ի համար կարևոր հենակետ է Սիրիայում ամերիկյան ուժերի հնարավոր միջամտության ժամանակ քիմիական զենքն ապստամբների ձեռքում հայտնվելու դեպքում. գրում է ավստրիական պարբերականը: Հորդանանի մայրաքաղաք Ամանի հյուսիսում գտնվում է ԱՄՆ-ի ղեկավարության տակ գտնվող հատուկ պատրաստվածություն անցած ուժերի կենտրոն:

Սիրիայի քիմիական զենքը լուրջ գլխացավանք է դարձել միջազգային հանրության համար: Ընդ որում, դրա հնարավոր կիրառման դեպքում Ասադի ռեժիմի տապալումը զարգացման տարբերակներից միայն մեկն է: Հարևան երկրների համար ավելի սարսափեցնող ու ցինիկ սցենար կզարգանա, եթե քիմիական զենքը հայտնվի ապստամբների ձեռքում, որոնց թվում՝ սուննի ջիհադականներն են, ովքեր պնդում են, թե Դամասկոսի ազատագրումից հետո հերթը հասնելու է Երուսաղեմին՝ ի լրումն Ամանի և Բաղդադի:

Իսրայելը տագնապով է նայում Ասադի և Իրանի դաշնակից Լիբանանում գործող շիական «Հիզբոլլահին»: Եվ չորեքշաբթի օրը իսրայելա-սիրիական սահմանին Իսրայելի ռազմաօդային հարձակումը կարելի է նայել հենց այս տեսանկյունից:

Հունվարի կեսին արդեն հայտարարվել էր, որ Հորդանանի տարածքում գտնվող հատուկ ստորաբաժանումների ջոկատները պատրաստ են միջամտել սիրիական հակամարտությանը, եթե քիմիական զենքն անցնի ապստամբների ձեռքը:

ԱՄՆ-ը նվազագույնը 6000 հոգուց բաղկացած մեկ մշտական ջոկատ ունի, որը մշտապես պահվում է բարձր մարտական պատրաստվածության մակարդակի վրա: Դա նշանակում է, որ ջոկատի առաջին խումբը՝ շուրջ 800 հոգի, մի քանի ժամվա ընթացքում կարող է հատել Սիրիայի հետ Հորդանանի օդային սահմանը: